अनलाइन डबली
काठमाडौँ । काठमाडौँ महागनरपालिकाका मेयर बालेन्द्र साहको निर्देशनमा प्रहरी घरघरमा पसेर कुटपिट गर्न थालेको भन्दै बन्चरेडाँडाबासीले विरोध जनाएका छन् । उनीहरुले आफूहरुका माग पूरा गर्नुको साटो प्रहरीलाई दमनमा उतारेको भन्दै विरोध जनाएका छन् ।
सोमबार साँझ शहरी विकास मन्त्रालयमा काठमाडौँ महानगरपालिकासहित स्थानीय जनप्रतिनिधिहरुबीच फोहोर बन्चरेडाँडास्थित डम्पिङसाइडमा फाल्ने सहमति भएको थियो । सहमतिअनुसार आज विहानै फोहोर बोकेका गाडीहरु त्यसतर्फ गएका थिए । फोहोरका गाडीहरु स्थानीयले रोकेका थिए । उनीहरुले आफूहरुका मागहरु पूरा नभएको भन्दै गाडी रोकेका थिए ।
स्थानीयले अवरोध गरेपछि प्रहरी परिचालन गर्नु परेको काठमाडौँ महानगरपालिकाले जनाएको छ । प्रहरीले केही स्थानीयलाई नियन्त्रणमा लिएको छ । उनीहरुलाई घरघरभित्र पसेर लछारपछार गर्दै बाहिर निकालेको भिडियो सामाजिक संजालमा सार्वजनिक भएका छन् । उनीहरुले मेयर साहले आफूविरुद्ध प्रहरी परिचान गरेको भन्दै विरोध जनाइरहेका छन् ।
चुनाव जितेर डम्पिङ क्षेत्र पुगेको बेला मेयर साहले फोहोर फाल्न बल प्रयोग नगर्ने स्थानीयसँग बताएका थिए । स्थानीयले साह आफ्नो प्रतिवद्धताबाट पछि हटेर प्रहरी दमन गरेर फोहोर लागेको भन्दै विरोध जनाएका छन् । प्रहरीले अवरोध पटाएपछि केही गाडीहरु डम्पिङ क्षेत्रमा पुगेका छन् भने केही बाटोमै रहेका छ्न । स्थानीयबासीले जनप्रतिनिधिहरुले आफूहरुसँग सल्लाह र माग छोडेर सहमति गरेको भन्दै अबरोध जारी राख्ने बताएका छन् ।
सोमबार साँझ शहरी विकास मन्त्रालय, काठमाडौं महानगरपालिका, नुवाकोटको ककनी गाउँपालिका र धादिङको धुनिबेसी नगरपालिकाका प्रतिनिधिहरुबीच फोहोर व्यवस्थापनबारे संयुक्त छलफल भएको थियो । मन्त्रालयमा भएको छलफलपछि सो क्षेत्रमा फोहोर बिसर्जन गर्ने सहमति भएको थियो ।
शहरी विकास मन्त्री रामकुमारी झाँक्री, काठमाडौं महानगरका मेयर बालेन्द्र साहको उपस्थितिमा भएको सहमति कार्यान्वन गर्न स्थानीयले अबरोध पुर्याएपछि काठमाडौँको फोहोर अझै उठ्नेमा शंका पैदा भएको छ ।
