अनलाइन डबलीकाठमाडौं । पोखराबाट जोमसोम उडेको तारा एयरको जहाजको अवस्था अझै अज्ञात नै छ । आइतबार विहान ९ः५५ बजे पोखराबाट उडेको ९ एन एईटी टि्वनअटर विमानको खोजी कार्य भइरहेको छ ।
जहाजमा २ विदेशी, ४ भारतीय र १३ नेपाली यात्रु र चालकदलका ३ सदस्य रहेको तारा एयरले जनाएको छ । जहाजलाई क्याप्टेन प्रभाकरप्रसाद घिमिरेले उडाएका थिए ।
जहाज मुस्ताङको लेते नजिकै पर्ने टिटी भन्ने स्थानमा दुर्घटना भएको आशंका गरिएको छ । स्थानीयका अनुसार टिटीमा ठूलो आवाज आएको बताएका छन् । स्थानीयले प्रहरीलाई खबर गरेको मुस्ताङ प्रहरीले जनाएको छ । विमान लेते क्रस भएपछि सम्पर्कबिहीन भएको थियो ।
मुस्ताङ र पोखराबाट दुई वटा निजी हेलिकोप्टर प्रयोग गरेर जहाजको खोजी भइरहेको छ । उनका अनुसार नेपाली सेनाको हेलिकोप्टरलाई पनि खोजीमा प्रयोग गर्ने तयारी भइरहेको छ ।
यसैबीच, मुस्ताङको घाँसामा ठूलो आवाज सुनेको र आगो बलेको देखेको भन्दै स्थानीयले खबर गरेका छन् । तर त्यहाँ अहिलेसम्म प्रहरी वा अन्य कुनै निकाय पुगेको छैन । प्रहरीका अनुसार यो सूचनालाई पुष्टि गर्ने प्रयास भइरहेको छ । यद्यपि, अहिले हराएको विमानको खोजीलाई त्यसतर्फ केन्द्रित गरिएको प्रहरीले जनाएको छ ।
- फाइल तस्विर
