अनलाइन डबली
कोहलपुर । इलाका प्रहरी कार्यालय कोहलपुरको थुनुवा कक्षमा रहेका एक जना थुनुवा मृत फेला परेका छन्। कोहलपुर नगरपालिका वडा नं. १२ का ४७ वर्षीय कृष्णलाल कुँवर बुधबार बिहान मृत फेला परेका हुन्।
जिल्ला प्रहरी कार्यालय बाँकेका प्रहरी प्रवक्ता डिएसपी मधुसुदन न्यौपानेले थुनुवा कक्ष परिसरकै शौचालयको भेन्टिलेटरमा आफ्नै टिसर्टको पासो लगाई झुण्डिएर आत्म ह त्या गरेको अवस्थामा फेला परेको बताए।
कुँवर बुधबार बिहान साढे ४ देखि ५ बजेको समयमा झुण्डिएर आत्महत्या गरेको आशंका गरिएको प्रवक्ता न्यौपानेले जानकारी दिए।
न्यौपानेका अनुसार जबरजस्ती करणी आरोपपछि प्रहरीले उनलाई वैशाख १९ गते नियन्त्रणमा लिएर थुनुवा कक्षमा राख्दै आएको थियो।
प्रहरीका अनुसार कुँवर थुनामा परेको २४ दिन जति भएको थियो। प्रहरीले अदालतमा मिसिल बुझाइसकेको समयमा उनी मृत फेला परेका हुन्।
‘थुनुवा कक्षका अन्यलाई सोधपुछ गर्दा कुँवर निकै निराशावादी कुरा गरिरहन्थे भन्ने छ,’ डिएसपी न्यौपानेले भने, ‘शव पोष्टमर्टमका लागि कोहलपुर शिक्षण अस्पतालमा पठाइएको छ।’
