काठमाडौं । भरतपुर महानगरपालिकाको मेयरमा नेकपा माओवादी केन्द्रकी उम्मेदवार रेणु दाहाल विजयी भएकी छन् । मत गणना जारी रहेपनि रेणु विजयी भएकी हुन् । गणना गर्न बाँकी भन्दा उनले मतान्तर बढी बनाएर सम्पूर्ण मत गणना नहुँदै विजयी भएकी हुन् ।
सोमबार राति भरतपुर कूल खसेको मत १ लाख २७ हजार ८३९ मध्ये १ लाख १६ हजार ६६६ गणना भइसकेको छ । जसमा रेनु दाहालले ४७ हजार ४० मत प्राप्त गरेकी छन् भने नेकपा एमालेका मेयर उम्मेदवार विजय सुवेदीले ३५ हजार ५८३ मत पाएका छन् । दाहाल र सुवेदीको मतान्तर ११ हजार ४५७ रहेको छ । जुन गणना गर्न बाँकी रहेको मतभन्दा बढी हो ।
यस्तै स्वतन्त्र उम्मेदवार जगन्नाथ पौडेलले १४ हजार २६३ मत पाएका छन् । यस्तै महानगरपालिकाको उपमेयर पदमा नेपाली काँग्रेसका चित्रसेन अधिकारी पनि मत गणना गर्न बाँकी हुँदा नै विजयी भएका छन् । अधिकारीले ४७ हजार ९५८ मत पाएका छन् भने राप्रपाकी हिमला गुरुङले २७ हजार ९२२ पाएकी छन् । अधिकारीले २० हजार बढी मतान्तर बनाइसकेकाले मतगणना सकिनुअघि नै विजयी भएका हुन् ।
रेणुले जित्ने पक्का भएसँगै भतरपुबासी खुशीयाली मनाउन सडकमा निस्किएका छन् ।
यसैबीच पाेखरा महानगरपालिकामा अहिलेसम्म १ लाख ३४ हजार ३ सय ५१ मतगणना भएकाे छ । पछिल्लाे मत परिणाम अनुसार गठबन्धनका तर्फबाट मेयर पदका उम्मेदवार नेकपा समाजवादीका धनराज आचार्यले ५४ हजार ६ सय ७८ मत पाउनु भएकाे छ । त्यस्तै मेयर पदका प्रतिस्पर्धी नेकपा एमालेका कृष्ण थापाले ४९ हजार ७ सय ८६ मत पाउनु भएकाे छ । आचार्य थापाभन्दा ४ हजार ८ सय ९२ मतले अगाडि छन् ।
यस्तै, उपमेयरतर्फ नेकपा एमालेकी मञ्जुदेवि गुरुङकाे अग्रता कायमै छ । उहाँले ५६ हजार ९ सय ६६ मत पाउनु भएकाे छ भने नेपाली कांग्रेसकी काेपिला रानाभाटले ५२ हजार ९ सय ५९ मत पाएकी छन् । रानाभाट ४ हजार ७ मतले पछाडि छन् ।