काठमाडौँ । नेपाल कम्युनिस्ट पार्टीका केन्द्रीय सदस्य गुणराज लोहनीले अर्को समूहले आफूहरुलाई गरेको कारवाही हास्यस्पद भएको बताएका छन् । उनले पहिला आफूहरुले कारवाही गरेको र कारवाही परेका नेताहरुले उल्टो कारवाही गरको विज्ञप्ति निकाल्नु मजाक मात्रै भएको बताए ।

चितवन भेलामा सहभागी लोहनीले अनलाइन डबलीसँग कुरा गर्दै १२ औं केन्द्रीय समिति बैठकको निर्णयविरुद्ध गएपछि आफूहरुले विप्लव र प्रकाण्डलाई बुधबार विहान बसेको बैठकले कारवाही गरेको जानकारी दिए । “पार्टी निर्णयविरुद्ध उहाँहरु गएपछि हामीले विहान ८ बजे कारवाही गरेका थियौँ, कारवाही परेका नेता प्रकाण्डले विज्ञप्ति निकालेर कारवाही गरेको भनेर हल्ला चलाएका छन्, यसको कुनै औचित्य छैन । यो हास्यास्पद नभएर मजाकको विषय बनेको छ ।” उनले आफू कारवाहीमा परिसकेपछि विज्ञप्ति निकालेर आत्मारति लिएको बताए । उनले प्रकाण्ड फन्टुस भएकाे समेत बताए ।

लोहनीले विप्लव र प्रकाण्डले एकीकृत जनक्रान्तिलाई संशोधनवादको दलदलमा पुर्याएर देश र जनताप्रति धोका दिएकोले आफूहरुले विद्रोह गरेको बताए । लोहनीले विप्लवले नाम कम्युनिस्ट दिएपनि कम्युनिस्ट र माक्र्सवादका आधारभूत सिद्धान्तलाई लत्याएका कारण समस्या भएको उत्पन्न हुँदै आएको बताए ।

भेला सुरु हुनुपूर्व बुधबार विहान बसेको बैठकले महासचिव विप्लव र प्रवक्ता खड्क बहादुर विश्वकर्मा प्रकाण्डलाई पदमुक्त गरेको थियो । त्यसको केही घण्टापछि प्रकाण्डले विज्ञप्ति जारी गरेर केन्द्रीय सदस्य उदयबहादुर चलाउने र गुणराज लोहनीलाई पार्टीबाट निस्काशन गरेका थिए ।

बुधबारबाट सुरु भएको विशेष राष्ट्रिय भेला शुक्रबार समान हुने बताइएको छ । संयोजक धर्मेन्द्र बास्तोलाले पेश गरेको ‘एकीकृत जनयुद्ध’ नामक दस्तावेजमाथिको छलफल सकिएको छ । छलफलको लागि १३ वटा समूह बनाइएको थियो । विहान खाना खाएर समूहगत छलफलको टोली नेताहरुले निष्कर्ष सुनाउने सुरु गरेका छन् । केन्द्रीय सदस्य लोहनीले धारणा राख्ने क्रम आजै सकिने बताए ।

भेला भोलि नै समापन गर्ने कार्यतालिका रहेको छ । पार्टी पुनर्निमाणको अभियान देशभर लैजाने बताइएको छ । पहिलो चरणमा पार्टी पुनर्निर्माण गरेर भेरा गरेर थप निर्णय लिने एक नेताले बताए ।