काठमाडौं । मेलम्चीमा फेरि बाढी आएको छ । सिन्धुपाल्चोकको मेलम्चीमा गएराति फेरि बाढी आउँदा असार १ गते बगाउन नसकेका घर र पुलमा बगेका छन् ।
स्थानीयका अनुसार असार १ गते बगाउन नसकेको रेडियो मेलम्चीको भवन, पुलसहित दर्जन बढी घरमा क्षति पुगेको छ । त्यस्तै, बाढीले तालामाराङको प्रहरी चौकी विस्थापित भएको छ ।
सिन्धुपाल्चोक प्रहरीका अनुसार लेदो माटोसहितको बाढीले केही घरमा क्षति पुगेको र केही घरमा पानी पसेको छ । असार १ गते क्षति पुर्याएको रातो पुल पनि बगाएको छ । जबकी असार १ गते आएको बाढीले पुल बगेको थिएन ।
हेलम्बु गाउँपालिका–१ हेमाथाङ्का चौरमा पहिरो गएर केहीबेर थुनिएपछि बाढी आएको गरिएको छ । अहिले पनि चनौटे बजारको बीच भागबाटै पानी बगिरहेको छ ।
यसअघि असार १ गते आएको बाढीले पनि हेलम्बु र मेलम्ची लगायतमा ठूलो क्षति पुर्याएको थियो । सो बाढीका कारण ५ जनाको मृत्यु भएको थियो भने १५ जना अझै बेपत्ता छन् ।
बाढीपहिरो पीडितहरु विस्तारै सामान्य अवस्थामा फर्किंदै गर्दा गएराति फेरि बाढी आएपछि उनीहरु थप समस्यामा परेका छन् । यसअघिकै स्थानबाट अहिले पनि लेदो माटोसहितको बाढी बगेको स्थानीयले बताएका छन् ।
फेरि बाढी आएसँगै मेलम्चीबासीले असार १ गतेको झल्को दिएको भन्दै त्रसित बनेका छन् ।
