काठमाडौं । भारतले धोका दिएपछि सरकारले चीनसँग कोरोना भाइरसविरुद्धको खोप खरिद गर्ने सम्झौता गरेको छ । भारतीय कम्पनीले अग्रमि भुक्तानी लिएर पनि खोप उपलब्ध नगराएपछि सरकारले चिनियाँ कम्पनी सिनोफार्मसँग खोप ल्याउने सम्झौता गरेको हो ।
स्वास्थ्य तथा जनसंख्या मन्त्रालयका प्रवक्ता डा. कृष्ण पौडेलले सिनोर्फमसँग खोप खरिदको सम्झौता भएको जानकारी दिएका छन् । २४ असारबाट खोप आपूर्ति सुरु हुने र साप्ताहिक रुपमा आउने पनि जानकारी दिएका छन् । तर कति खोप आपूर्तिका लागि कति मूल्यमा सम्झौता भएको खुलाएका छैनन् ।
स्वास्थ्य मन्त्रालय स्रोतले ४० लाख डोज खरिदका लागि सम्झौता भएको बताएको छ । नन् डिस्क्लोजेवल एग्रिमेन्ट (एनडीए) अनुसार खोप खरीद गरिएको बताइएको छ ।
मन्त्रालयका ती अधिकारीका अनुसार पछिल्लो २ साता चीनसँग ननडिस्कोजेवल एग्रिमेण्ट गर्न सरकारले पहल गरिरहेको थियो । नेपालले खोप खरीदको लागि प्रस्ताव राख्दा चीनले गोप्य सम्झौता गर्नुपर्ने बताएको थियो ।
भारतले अग्रमि भुक्तानी लिएर पनि समयमै खोप उपलब्ध नगराएका कारण चीनसँग खरिद सम्झौता गर्न बाध्य भएको स्वास्थ्य मन्त्रालयका अधिकारीहरुको भनाई छ ।
भारतबाट ल्याइएको खोपको पहिलो डोज लगाएका जेष्ठ नागरिकले समेत दोस्रो डोज पाएका छैनन् । भारतीय कम्पनीले सरकारसँग सम्झौता गरेको तर केही निजि कम्पनीसँग खोप दिन चाहेको बताइएको छ ।
यसले खोपको कालोबजारी र कृतिम अभाव सिर्जना गर्ने थियो । अब चीनसँग सम्झौता भएपछि कालोबजारीमार्फत भारतबाट खोप ल्याएर मोटो रकम असुल गर्ने योजना बनाएकाहरुको सपना पूरा नहुने भएको छ ।
