काठमाडौं । नेकपा एमालेका दुबै समूहबीच छलफल सुरु भएको छ । सर्वोच्च अदालतको फैसलापछि पहिलो पटक दुबै समूहका नेताहरु छलफलमा जुटेका हुन् । छलफलमा अध्यक्ष तथा प्रधामन्त्री ओली, नेताहरु माधव कुमार नेपालसँगै अन्य नेताहरु पनि सहभागी छन् ।
सर्वोच्चको फैसलापछि प्रचण्डसँग छुटिएर एमालेमै फर्किएका नेता माधव कुमार नेपाल समूहलाई नबोलाएरै अध्यक्ष तथा प्रधानमन्त्री केपी शर्मा ओलीले केन्द्रीय समिति बैठक बोलाएसँगै विवाद उत्कर्षमा पुगेको थियो ।
यसअघि ओलीले समूहले अध्यक्ष र महासचिवबाहेकका सबै पद खारेज गरेर नेपाल समूहका नेताहरुलाई भूमिकाविहीन बनाएको थियो । (नेकपा) को विवादमा ओलीतिर लागेका माओवादी केन्द्रका नेताहरुलाई नेपाल समूहका नेताहरुको जिम्मेवारी खोसेर दिइएको थियो ।
तीन नम्बर प्रदेशबाट अष्टलक्ष्मी शाक्यलाई हटाएर गृहमन्त्री रामबहादुर थापालाई जिम्मा दिइएको थियो । त्यस्तै सुदूरपश्चिम प्रदेशको इन्चार्जबाट भीम रावललाई हटाएर लेखराज भट्टलाई जिम्मेवारी दिइएको थियो ।
ओली समूहले गरेको निर्णयलाई मान्यता नदिन नेपाल समूहले सोमबार निर्वाचन आयोगमा निवेदन दिएपछि ओली समूहलाई छलफलको लागि बाध्य पारेको बताइएको छ ।
छलफलमा ओलीका तर्फबाट ईश्वर पोखरेल, विष्णुप्रसाद पौडेल, प्रदीपकुमार ज्ञवाली र सुवास नेम्वाङ छन् भने नेपाल समूहको तर्फबाट भीम रावल, सुरेन्द्र पाण्डे, घनश्याम भूसाल, र रघुजी पन्त सहभागी छन् ।
चार महिनापछि ओली र नेपाल बीच भेटवार्ता भएको हो । गएको २५ कात्तिकपछि संवाद टुटेको थियो।
आजको छलफललाई महत्वको साथ हेरिएको छ । ओली आफ्ना कदमबाट पछि नहटेसम्म नेपाल समूह केन्द्रीय समिति बैठकमा सहभागी नहुने बताउँदै आएको छ ।
