काठमाडौं । नेपाल इन्फ्रास्ट्रक्चर बैंकको आईपीओ डिम्याट खातामा आएको छ । उक्त बैंकको शेयर आगामी सातादेखि दोस्रो बजारमा कारोबार हुने भएको छ ।
कम्पनीले माघ २ देखि ६ गतेसम्म सर्वसाधारणका लागि आईपीओ विक्री गरेको थियो । माघ १६ गते बाँडफाँट भएको शेयरमा अधिकतम ६० कित्तासम्म शेयर परेको थियो । ४ लाख ९२ हजार ७२ जनाले ६० कित्तासम्म शेयर पाएका थिए ।
कम्पनीले जारी पूँजी २० अर्ब रुपियाँको ४० प्रतिशतले हुन आउने ८ अर्ब रुपियाँ बराबरको ८ करोड कित्ता आईपीओ निष्काशनमा ल्याएको थियो । त्यस मध्ये ०.२० प्रतिशत अर्थात १ लाख ६० हजार कित्ता शेयर कर्मचारीहरुका लागि र ५ प्रतिशतले हुन आउने ४० लाख कित्ता शेयर सामूहिक लगानी कोषका लागि छुट्टाएर बाँकी ७ करोड ५८ लाख ४० हजार कित्ताका लागि सर्वसाधारणलाई निष्काशनमा ल्याएको थियो ।
कम्पनीको पहिलो कारोबारका लागि प्रतिशेयर न्युनतम ११३ रूपैयाँ ६२ पैसादेखि अधिकतम ३४० रूपैयाँ ८६ पैसा ओपनिङ रेञ्ज निर्धारण गर्ने सम्भावना रहेको छ । यस कम्पनीले धितोपत्र बजारको इतिहासमै सबैभन्दा बढी कित्ता शेयर सर्वसाधारणमा जारी गरेको हो ।
