काठमाडौं । भारतमा एकै दिन कोरोना भाइरस संक्रमणबाट अहिलेसम्मकै उच्च विन्दुमा पुगेको छ । आइतबार भारतमा एकै दिन संक्रमितको संख्या ९२ हजार नजिक पुगेको छ ।
भारतीय संचारमाध्यमहरुका अनुसार गएको २४ घण्टामा एकैदिन ९१ हजार ७२३ जनामा कोरोना संक्रमण पुष्टि भएको छ । योसँगै भारत कोरोना संक्रमितको सूचीमा दोस्रो स्थानमा पुगेको छ ।
भारतमा कोरोना संक्रमितको संख्या ४२ लाख माथि पुगेको छ भने ज्यान गुमाउनेको संख्या ७१ हजार भन्दा बढी पुगेको छ । अहिले पनि भारतमा ८ लाख ८३ हजार सक्रिय संक्रमित रहेका छन् ।
अमेरिका, ब्राजिल, दक्षिण अफ्रिकालगायत मुलुकहरूमा भने संक्रमणदर घट्दै गएको छ तर भारतमा भने संक्रमण झन् बढ्दै गएको छ । भारतमा हालसम्म ३२ लाख ४७ हजार उपचारपछि निको भएको तथ्यांक छ ।
आइतबारसम्म अमेरिकामा कूल संक्रमितको संख्या ६४ लाख ६० हजार पुगेको छ । अमेरिकामा हालसम्म कोरोनाका कारण एक लाख ९३ हजार बढीले ज्यान गुमाइसकेका छन् ।
दोस्रोबाट तेस्रो स्थानमा झरेको ब्राजिलमा कूल संक्रमितको संख्या ४१ लाख ३७ हजार पुग्दा ज्यान गुमाउनेको संख्या एक लाख २६ हजार नाघेको छ ।
पछिल्लो तथ्यांकअनुसार विश्वमा कोरोना संक्रमितको संख्या दुई करोड ७२ लाख ८९ हजार पुगेको छ । हाल सक्रिय संक्रमितको संख्या ७० लाख २८ हजार रहेको छ ।
