पर्वत । जिल्लाको कुश्मा नगरपालिका–३ दुर्लुङको काहुलेमा आएको पहिरोमा परी ज्यान गुमाउनेको संंख्या ८ पुगेको छ । एक जना अझै बेपत्ता छन् । शनिबार साँझ भारी वर्षासँग आएको पहिरोमा परी दुई घर पुरिएका थिए ।
स्थानीय तुलबहादुर थापा र विकास बिकको घरलाई पहिरोले पुरेको थियो । थापाका ६ जना बिकका ३ जना परिवारका सदस्यलाई पहिरो पुर्यो । आइतबार दिउँसोसम्म ८ जनाको शव भेटिएको छ भने एकजना बेपत्ता नै छन् ।
थापा परिवारका ५३ वर्षीय तुलबहादुर थापा, उनकी श्रीमती ५२ वर्षीय मिनकुमारी थापा, नातिनी ८ वर्षीया बिबिसा र नाती १४ वर्षीय सम्राट थापा, तुलबहादुरकी विवाहित छोरी ३४ वर्षीय दिपा थापा र दिपाका छोरा १७ वर्षीय विवेक थापाको पहिरोमा परी ज्यान गएको छ ।
त्यसैगरी विकासकी श्रीमती ३२ वर्षीया कमला बिक र छोरी ८ वर्षीया प्रमिशा बिकको शव भेटिएको छ भने १३ वर्षीय जेनिस बिकको भने शव भेटिएको छैन । खोजी कार्य जारी रहेको छ ।
पहिरोबाट तुलबहादुरका छोरा अम्मर थापा र बुहारी रिमाया थापा भने ज्यान जोगिएका छन् । उनीहरु घरदेखि झण्डै पाँच सय मिटर परको डाँडामा पसल संचालन गर्दै आएका थिए भने छोरा सम्राट र छोरी विविशाले भने पहिरो परी ज्यान गुमाए ।
त्यसैगरी विकास विक वैदेशिक रोजगारीको क्रममा विदेश छन् । घर परिवार समालिरहेकी श्रमति कमला छोरीको शव भेटिएको छ भने छोरा जेनिसको खोजीकार्य भइरहेको छ ।
तुलबहादुरी छोरी दिपाको घर बागलुङको जैमिनी नगरपालिका–१ पैंयुथन्थाप. भएपनि उनी कुश्माबजारमा छोरा पढाएर बस्दै आएकी थिइन् । लामो लकडाउनका कारण माइतीघरमा बस्दै आएको बताइएको छ ।
फोटो- बैकुण्ठ गिरी
