सुर्खेत । नेपालमा कोरोना भाइरसका कारण मृत्यु हुनेको संख्या ११ पुगेको छ । सुर्खेतका एक युवाको मृत्यु पनि कोरोनाकै कारण भएको पुष्टि भएसँगै यो संख्या पुगेको हो ।
सुर्खेतको पश्चिम पञ्चपुरी नगरपालिका–१ का मृत्यु भएका २० वर्षीय युवामा कोरोना संक्रमण भएको रिपोर्ट आएको छ । आरडिटी रिपोर्ट नेगेटिभ आएपछि क्वारेन्टाइनबाट घर फर्र्किएका हाँलेका ति युवाको विहीबार विहान मृत्यु भएको थियो । घर पुगेको केही घण्टामै स्वास्थ्यमा सामान्य समस्या देखिएका उनको उपचार हुन नपाएरै मृत्यु भएको थियो ।
भारतबाट आएका ती युवाको पिसीआर परीक्षणको लागि स्वाब संकलन गरिएको थियो । कर्णाली प्रदेश स्वास्थ्य निर्देशनालयका प्रयोगशालामा परिएको परीक्षणको क्रममा कोरोना पोजेटिभ छ । प्रयोगशालाका संयोजक ओम आचार्यका अनुसार शुक्रबार विहान कोरोना पोजेटिभ रिपोर्ट आएको हो ।
जेठ ७ गते भारतबाट फर्केका ती युवालाई जनता मावि विद्यापुरको क्वारेन्टिनमा राखिएको थियो । उनलाई जेठ २१ गते दिउँसो घर पठाइएको थियो तर राति २ बजे मृत्यु भएको थियो ।
कर्णाली प्रदेशमा दुई जनाको कोरोनाबाट मृत्यु भइसकेको छ । यसअघि दैलेख दुल्लुका एक पुरुषको पनि कोरोनाकै कारण मृत्यु भएको थियो ।
