News Portal

  • आजको मौसमः बर्षा-असिनासँगै चट्‍याङ

    २५८ पटक

    काठमाडौं । केही दिन सुधार भएको मौसम विहीबारबाट बदली भएको छ । शुक्रबार पश्चिम क्षेत्रमा बर्षासँगै असिना परेको थियो भने देशका अधिकांश क्षेत्रमा बदली भएको थियो ।

    मौसम पूर्वानुमान महाशाखाका अनुसार शनिबार पनि देशका अधिकांश क्षेत्रमा मौसम बदली हुनुको साथै बर्षा-असिना र चट्‍याङ गर्नेछ । पश्चिमी वायुको प्रभावका नेपालमा मौसम बदली भएको महाशाखाले जनाएको छ ।

    अहिले देशका मध्य र पूर्वी भागमा सामान्यदेखि पूर्ण बदली रहेको र पश्चिमी भूभागमा आंशिक बदली भएको महाशाखाले जानकारी दिएको छ । पूर्वी भागका केही स्थानमा भने हल्का वर्षा भइरहेको महाशाखाले जानकारी दिएको छ ।

    महाशाखाले दिउँसो देशका पूर्वी भू–भागमा सामान्यदेखि पूर्ण बदली रहि मध्य तथा पश्चिमी भू–भागमा आंशिकदेखि सामान्य बदली रहने जनाएको छ ।

    महाशाखाका अनुसार देशका केहि स्थानहरूमा मेघ गर्जन, चट्याङ्ग, असिना र हावाहुरी सहित वर्षाको सम्भावना रहेको छ। देशको उच्च पहाडी तथा हिमाली भू–भागमा हल्का देखि मध्यम हिमपातको सम्भावना छ ।

    यसैगरी, राति देशका अधिकांश भू–भागमा सामान्य बदली रहनेछ। देशका पश्चिमी भू–भागका थोरै स्थानहरुमा साथै मध्य तथा पूर्वी भू–भागका केहि स्थानहरूमा मेघ गर्जन, चट्याङ्ग, असिना, हावाहुरीसहित वर्षाको सम्भावना रहेको छ।

    देशको उच्च पहाडी तथा हिमाली भू–भागमा हल्का देखि मध्यम हिमपातको सम्भावना छ भने आइतबारबाट मौसममा सुधार आउने पनि महाशाखाले जनाएको छ।

    प्रतिकृया दिनुहोस्