काठमाडौं । आजको पहिलो खेलमा बुटवल ब्लास्टर्सले अघिल्लो संस्करणको विजेता पोखरा पल्टनलाई ८ विकेटले पराजित गरेको छ ।
दोस्रो संस्करणको नमस्ते पोखरा प्रिमियर लिग ९पिपीएल० टी-२० क्रिकेट प्रतियोगिताअन्तर्गत पोखरा रङ्गशालास्थित क्रिकेट मैदानमा टस हारेपछि पहिला ब्याटिङ शुरु गरेको पोखराले पूरै ओभर खेल्दै ५ विकेटको क्षतिमा १२१ रन बनायो ।
प्रतियोगितामा आफ्नो दोस्रो जितको खोजीमा रहेको बुटवल पोखराले दिएको १२२ रनको लक्ष्य १४ ओभरमा मात्र दुई विकेटको नोक्सानीमा भेट्टायो । प्रतियोगितामा ४ खेल खेलि सकेको पोखराले एक खेल मात्र जित हाँसिल गरेको छ ।
अब पोखराले ‘प्लेअफ’ खेल्नका लागि बाँकी एक खेल जितेर मात्र पुग्दैन अरु टोलीको नतिजामासमेत भर पर्नुपर्ने बाध्यता छ । शुरुआती ब्याटस्म्यान अफ्ताबुद्दिन अहमद र शङ्कर रानाले पहिलो विकेटका लागि ८७ रनको उत्कृष्ट साझेदारी गरेपछि बुटवलले खेलमा सुखद शुरुआत गरेको थियो ।
आफ्नो अर्धशतक पूरा गर्ने क्रममा रसिद खानको बलमा ‘क्याच आउट’ हुनुअघि खेलका ‘म्यान अफ दी म्याच’ अहमदले ४६ बलमा १२ चौका र दुई छक्कासहित ७५ रन जोडे । जितसँगै बुटवलले चितवन राइनोजसँग समान ४ अंक बराबरी गरेको छ ।
यद्यपि चितवनले एक खेल कम खेलेको छ भने अन्य टोलीको समान २ अंक रहेको छ । पहिलो ओभरको दोस्रो बलमा शुरुआती ब्याटस्म्यान कशुल भुर्तेल रनको खाता नै नखोलेर बाहिरिएपछि घरेलु टोली पोखरा दबाबमा आएको थियो ।
भुर्तेललाई ललित भण्डारीले एलबीडब्लु आउट गरेका थिए । पोखराका लागि रविइन्दर सिंहले ४२ बलमा दुई चौका र दुई छक्का सहित ४५ रनमा अविजित रहदै टोलीका लागि मध्यमस्तरको लक्ष्य प्रस्तुत गरे ।
त्यस्तै प्रथमेश ढाके २० बलमा एक चौका र एक छक्कासहित २० रनमा अविजित रहे भने रोहित पौडेलले १८ बलमा एक चौका एक छक्कासहित १९ रन जोडे । बुटवलका हर्ष टङ्कले ४ ओभर बलिङमा जम्मा १० रन खर्चिएर २ विकेट लिए भने शिवम सिंह, ललितसिंह भण्डारी र नितेश थापाले समान १-१ विकेट लिएका थिए ।
