काठमाडौं । अमेरिकी तल्लो सदनको न्यायीक समितिले राष्ट्रपति डोनाल्ड ट्रम्पमाथि महाअभियोग लगाउनेसम्बन्धी औपचारिक अभियोगहरु प्रमाणिकरण गरेको छ ।
सदनको न्यायीक समितिले राष्ट्रपति ट्रम्पमाथि महाअभियोग लगाउने सम्बन्धी २ बुँदे अभियोगसहितको प्रस्ताव पारित गरेको छ । अब ट्रम्पमाथिको महाअभियोग प्रस्ताव तल्लो सदनमा मतदानको प्रक्रियामा जाने छ ।
डेमोक्रेटिक पार्टीको नेतृत्वमा रहेको न्यायीक समितिमा पार्टी लाइन अनुसार नै मतदान भएको हो । समितिमा डेमोक्रेटिक बहुमत छ र उनीहरुले महाअभियोग प्रस्ताव पारित गरेर सदनमा पूर्ण मतदानका लागि अघि बढाउन मार्ग प्रस्तुत गरेका हुन् ।
तल्लो सदन हाउस अफ रिप्रिजेन्टेटिभमा आउँदो हप्ता मतदान हुने छ । डेमोक्रेटिक नेताहरुले सांसदहरुसंग महाभियोग प्रस्तावमा आफ्नो विवेकको प्रयोग गरेर मात्रै मतदान गर्न आग्रह गरेका थिए ।
न्यायीक समितिमा शुक्रबार सुनुवाईपछि भएको मतदानमा प्रस्तावको पक्षमा २३ र विपक्षमा १७ मत परेको हो । डोनाल्ड ट्रम्प अमेरिकाको इतिहासमा महाअभियोगको सामना गर्ने चौथो राष्ट्रपति हुन् ।
