काठमाडौं । आज (शुक्रबार) चन्द्रागिरिमा बिहान हिउँ परेको छ ।
बुधबार साँझदेखि नेपाल प्रवेश गरेको पश्चिमी वायुको प्रभावले देशभरि चिसो बढेका बेला चन्द्रागिरिमा हिउँ परेको हो ।
‘अहिले हल्काफुल्का हिउँ परिरहेको छ, साँझसम्म धेरै नै पर्ला जस्तो छ,’ चन्द्रागिरि हिल्स लिमिटेडका महाप्रबन्धक अभिषेक विक्रम शाहले भने । हिमपातसँगै काठमाडौं उपत्यकामा पनि चिसो बढेको महशुस भएको छ ।
शुक्रबार बिहानदेखि नै काठमाडौं उपत्यकासहित पूर्वी भागमा पनि आकाश बादलले भरिएको छ । मौसम पूर्वानुमान महाशाखाले काठमाडौंमा शुक्रबार साँझ पानी पर्न सक्ने जनाएको छ ।
‘एकदम हल्का वर्षा त भइसक्यो। आज साँझ ६-७ बजेतिर काठमाडौं उपत्यकामा मेघ गर्जनसहित पानी पर्ने देखिएको छ,’ उनका अनुसार शनिबारदेखि भने मौसममा सुधार हुँदै जानेछ ।
