काठमाडौं । पत्रकारमाथि आक्रमण गर्ने प्रहरीलाई कारवाहीको माग गर्दै खेल पत्रकारहरुले १३ औं सागको फाइनल खेल बहिस्कार गरेका छन् ।
मंगलबार रंगशालामा रिपोर्टिङका लागि पुगेका पत्रकार सुमन चापागाईंलाई सोह्रखुट्टे प्रहरी वृत्तका डीएसपी सन्तोषसिंह राठौरले मुक्का हानेका थिए । सोहीको विरोधमा खेल पत्रकारहरुले धर्ना दिएका हुन् ।
उनीहरु रंगशालाभित्र भइरहेको भुटान र नेपालबीचको खेल हेर्नसमेत गएका छैनन् । पत्रकारहरुले सुरक्षित रुपमा रिपोर्टिङ गर्न पाउने अधिकारको माग गरेका छन् ।
पत्रकार चापागाइँले प्रहरीले सर्वसाधरणमाथि गरेको ज्यादतीको भिडियो र तस्बिर खिचिरहेका थिए । सोही समयमा डिएसपी सन्तोष राठोरले उनीमाथि कुटपिट गरेका थिए । घाइतेको ब्लुक्रस अस्पतालमा उपचार भइरहेको छ । पत्रकार चापागाईँमाथि हातपात गर्ने प्रहरीमाथि कारबाही हुने महानगरीय प्रहरी प्रमुख डीआईजी शैलेस थापा क्षेत्रीले बताएका छन् ।
प्रहरीको ज्यादतीविरुद्ध विरोधमा उत्रिएका पत्रकारहरुले ‘गेट वेल सुन नेपाल प्रहरी, प्रहरी ज्यादती बन्द गर, समाचार संकलनको अधिकार रक्षा गर लगायतका नारा लगाएका थिए । खेल बहिस्कार गरी धर्नामा बसेका नेपाली पत्रकारहरुलाई विदेशी पत्रकारहरुले समेत साथ दिएका छन् ।
