काठमाडौं । भ्रमण वर्ष २०२० लाई सफल बनाउन नेपाली सेनाले विभिन्न ८ विधाका कार्यक्रम गर्ने भएको छ ।
भ्रमण वर्ष शुरु हुन केही दिन मात्र बाँकी हुँदा नेपाली सेनाले विभिन्न ८ विधाका कार्यक्रम गर्ने भएको हो । नेपाली सेनाले नेपाल भ्रमण वर्षका अवसरमा बहुराष्ट्रिय सैनिकबाट सगरमाथा आरोहण, संयुक्त राष्ट्रसंघीय शान्ति स्थापना कार्य सम्बन्धि दौड, कार्याशाला र पदयात्रा गर्ने कार्यक्रम रहेको प्रवक्ता विज्ञानदेव पाण्डले बताए ।
त्यसैगरी नेपाली सेनाले मुस्ताङको जोमसोममा हाइ अल्टीच्युड खेलकुद, थोरङला आरोहण, मनाङ, चितवन र बर्दिया राष्ट्रिय निकुञ्जको सफारी, र्याफ्टिङ, साइक्लिङका साथै सेमिनारको आयोजना गरी २० लाख पर्यटक भित्र्याउने सरकारको लक्ष्यलाई सहयोग गर्ने लक्ष्य राखेको नेपाली सेनाका महासेनानी सुवास थापाले उल्लेख गरे ।
त्यस्तै नेपाली सेनाले काभ्रेको धुलीखेलबाट पनौतीसम्म पदयात्रा गर्ने, गोरखाको लिगलिग दौडलाई थप व्यस्थित गर्ने जनाएको छ । भ्रमण वर्षलाई सफल पार्न साझेदारी संघसंस्थासँग गृहकार्य भइरहेको सचिवालयका सदस्य राजन पौडेलले जानकारी दिए ।
आगामी पुस १६ गते दशरथरङ्गशालामा भव्य कार्यक्रम गरी नेपाल भ्रमण वर्षको शुरुवात गरिने छ ।
