काठमाडौं । १३ औँ दक्षिण एसियाली खेलकुद (साग) प्रतियोगिता अन्तर्गत टी-२० क्रिकेटमा नेपालले भुटानमाथि शानदार जित हाँसिल गरेको छ ।
बिहीबार कीर्तिपुरस्थित त्रिवि क्रिकेट मैदानमा भएको खेलमा नेपालले भुटानलाई १ सय ४१ रनको विशाल अन्तरले पराजित गरेको हो । टस हारेर पहिला ब्याटिङ गरेको नेपालले तीन विकेटको क्षतिमा २३६ रनको विशाल योगफल तयार पारेको थियो ।
अन्तर्राष्ट्रिय टी-२० म्याचमा यो १८ औँ उच्च स्कोर हो । जवाफी ब्याटिङमा उत्रिएको भुटानले ६ विकेटको क्षतिमा ९५ रन मात्र बनायो ।
नेपालको जितमा कप्तान ज्ञानेन्द्र मल्ल नायक रहेका छन् । उनले शतकीय पारी खेल्दै ५५ बलमा १०७ रन बनाए । विस्फोटक ब्याटिङ गर्ने क्रममा उनले ९ छक्का र ५ चौका प्रहार गरेका छन् । नेपालले पहिलो विकेटका लागि १०८ रनको साझेदारीमार्फत गतिलो सुरुवात गरेका थिए ।
पूर्वकप्तान पारस खड्काले अद्र्धशतकीय पारी खेल्दै २८ बलमा ५७ रन बनाए । उनले एक छक्का र ९ चौका प्रहार गरे । यस्तै, दीपेन्द्रसिंह ऐरीले २७ बलमा ४५ रन बनाए । भुटानका लागि कर्मा दोर्जीले ४ ओभरमा ४५ रन खर्चिएर २ विकेट लिए ।
भने तोब्देन सिङ्ग्येले ४ ओभरमा ५३ रन दिएर एक विकेट हात पारे । भुटानका लागि रङजुङ्ग मिक्यो दोर्जीले सर्वाधिक २७ रन बनाए । यस्तै, सोनम तोब्गेले १५ र तोब्देन सिङ्ग्येले ११ रन बनाए । बलिङतर्फ नेपालका लागि पारस खड्काले २ विकेट लिए भने करण केसी, ललित राजवंशी र पवन शर्राफले १-१ विकेट लिएका छन् ।
