News Portal

  • भारतीय सुरक्षाकर्मीको क्याम्पभित्र गोलीबारी

    ३७१ पटक

    काठमाडौं । भारतमा एउटा सुरक्षा क्याम्पभित्र गोली चल्दा ६ जनाको मृत्यु भएको छ ।

    समाचार एजेन्सीका अनुसार माओवादी प्रभावित क्षेत्र छत्तीसगढको नारायणपुर जिल्लास्थित भारत-तिब्बत सीमा पुलिस बलको क्याम्पभित्र गोली चलेको हो ।

    बुधबार बिहान स्थानीय समयअनुसार करिब ९ बजे उक्त घटना भएको र सुरक्षाकर्मीबीच आपसमै गोलीबारी हुनुको कारण पत्ता लाग्न नसकेको जनाइएको छ ।

    स्थानीय प्रहरीलाई उद्धृत गर्दै भारतीय सञ्चारमाध्यमले जनाए अनुसार बटालियनमा आपसी विवादका कारण एक जवानले स्वचालित हतियारबाट आफ्नै सहकर्मीमाथि अन्दाधुन्द गोली चलाएका थिए ।

    गोली लागेर ५ जनाको मृत्यु भएको थियो । हमलाकारी ती जवानले आफैलाई गोली हानेर आत्महत्या गरेको बताइएको छ । आफ्नै सहकर्मीको हत्यापछि आत्महत्या गर्ने जवानको पहिचान खुलाइएको छैन ।

    यद्यपि सामाजिक सञ्जालमा स्थानीय स्रोतलाई उद्धृत गर्दै जनाइए अनुसार ४५ औं बटालियनका मुसुदुल रहमानले ५ सहकर्मीको हत्यापछि आत्महत्या गरेका हुन् । गोली लागेर २ जना घाइते भएका र उनीहरुलाई उपचारका लागि अस्पताल लगिएको छ ।

    प्रतिकृया दिनुहोस्