काठमाडौँ । जारी १३औँ दक्षिण एसियाली खेलकुद (साग) मा कराते र उसुमा नेपालले थप दुईवटा स्वर्ण पदक जितेको छ । करातेमा अनुपमा मगर र उसुमा दीपक हमालले स्वर्ण पदक जितेका छन् ।
बुधबार सातदोबाटोस्थित कभर्डहलमा भएको फाइनलमा उनले ६८ किलोमाथिको प्रतिस्पर्धामा पाकिस्तानकी नर्गिसलाई पराजित गर्दै अनुपमाले स्वर्ण जितेकी हुन् ।यससँगै करातेबाट नेपाललाई १० स्वर्ण हात परिसकेको छ । जारी सागमा नेपाललाई करातेबाटै मण्डेकाजी श्रेष्ठले पहिलो स्वर्ण पदक दिलाएका थिए ।
त्यसैगरी बुधबार नै भएको खेलमा दीपकले थाउलोमा स्वर्ण जितेका हुन् । उनले १९.३२ अंक जोडेका थिए भने भारतका साजन लामाले १९.१२ अंकका साथ रजत पदक जितेका छन् ।
मंगलबार २३ स्वर्ण जितेको नेपालले बुधबार बिहान २ स्वर्ण थप्दै स्वर्ण पदकको खातामा २५ पुर्याएको छ ।
अहिले १३ औं साग प्रतियोगिताअन्तर्गत विभिन्न खेलहरू जारी छन् ।
