News Portal

  • पुरुष क्रिकेटमा नेपाल ६ विकेटले श्रीलंकासँग हार्यो

    २६४ पटक

    काठमाडौं । दक्षिण एसियाली खेलकुद (साग) मा पुरुष क्रिकेटमा नेपाल श्रीलंकासँग पराजित भएको छ ।

    नेपालले दिएको १७३ रनको लक्ष्य श्रीलंकाले १९ ओभर एक बलमा ४ विकेट गुमाउँदै पूरा गरेको छ । श्रीलंकाका लागि एस असानले अविजित ७२ रन बनाए ।

    त्यस्तै निसान मदुस्काले ४६ रनको योगदान गरे । पी निसंकाले १२ बलमा ३० रन बनाए । श्रीलंकाले सुरुवात भने राम्रो गर्न सकेको थिएन । उसले ३६ रन बनाउँदा ३ विकेट गुमाएको थियो तरपछि असान र निसानले दरिलो साझेदारी गर्दा नेपाल हार्यो ।

    नेपालका लागि बलिङमा पवन सराफले २ तथा सुसान भारी र सोमपाल कामीले १-१ विकेट लिएका थिए । यसअघि कीर्तिपुर क्रिकेट मैदानमा टस हारेर ब्याटिङ गरेको नेपालले निर्धारित २० ओभरमा ५ विकेट गुमाएर १७२ रन बनाएको थियो ।

    नेपालका लागि दिपेन्द्र ऐरीले सर्वाधिक ७२ रन बनाए । उनले ४४ बलमा ४ चौका र ३ छक्का प्रहार गरे, पवन सर्राफले २२, विनोद भण्डारी र ज्ञानेन्द्र मल्लले समान २१-२१ रन तथा आरिफ शेखले १९ रन बनाए ।

    पारस खड्का मात्र एक रनमा पेभेलियन फर्किए । त्यसपछि आरिफ शेख १९ तथा ज्ञानेन्द्र मल्ल २१ रन बनाएर आउट भएका थिए । चौथो विकेटको लागि दिपेन्द्र ऐरी र विनोद भण्डारीले अर्धशतकीय साझेदारी गरे ।

    ५६ रनको साझेदारी गरेपछि विनोद २१ रन बनाएर आउट भए । पाँचौँ विकेटका लागि दिपेन्द्रले पवनसँग ६२ रनको साझेदारी गरे । श्रीलंकाको बलिङमा कामिन्दु मेन्डिसले २ विकेट लिए । असिथा फर्नान्डो, कभिस्का अन्जुला र दुभिन्दु तिलकरत्नेले समान १-१ विकेट लिए ।

    प्रतिकृया दिनुहोस्