काठमाडौँ । अखिल क्रान्तिकारीले सीमा अतिक्रमणविरुद्ध प्रदर्शनको क्रममा गिरफ्तार पछी रिहा भएका कविद्यार्थीहरुलाई सम्मान गरेको छ । सर्वोच्च अदालतको आदेशमा रिहा भएपछि विहीबार क्रान्तिकारीले क्रार्यक्रमको आयोजना गरेर सम्मान गरेको हो ।
विप्लव नेतृत्वको नेपाल कम्युनिस्ट पार्टी निकट अखिल क्रान्तिकारीको आह्वानमा भारतीय अतिक्रमणविरुद्ध कात्तिक २४ गते काठमाडौँमा विद्यार्थीले विरोध प्रदर्शन गरेका थिए । भारतले नेपालीभूमी कालापानी–लिपुलेकको क्षेत्रलाई आफ्नो राजनीतिक नक्सामा पारेपछि अखिल क्रान्तिकारी विरोध प्रदर्शनमा उत्रेको थियो ।
अखिल क्रान्तिकारीको मध्यकमाण्डको आयोजनामा गरिएको विरोध प्रदर्शनमाथि प्रहरीले हस्तक्षेप गरी दुईदर्जन विद्यार्थीलाई गिरफ्तार गरेको थियो । प्रहरीले गैरन्यायीक रुपमा गिरफ्तार गरेर विद्यार्थीलाई बन्दी बनाएको भन्दै परेको रिटमाथि सुनुवाई गर्दै सर्वोच्च अदालतले बुधबार विद्यार्थीलाई रिहा गर्न आदेश दिएको थियो । रिहा भएका १९ जना विद्यार्थीहरुलाई अखिल क्रान्तिकारी काठमाडौँ र क्याम्पस जिल्लाले फरक फरक सम्मान गरेको थियो ।
सम्मान कार्यक्रममा बोल्दै अखिल क्रान्तिकारीका उपत्यका क्षेत्रीय समन्वय समिति संयोजक हर्कबहादुर बिकले सीमा अतिक्रमणको विरोध गर्दा गिरफ्तार गरिनु आपत्तिजनक भएको भन्दै रिहा भएका विद्यार्थीहरुलाई बधाई दिएका थिए ।
“भारतले सीमा अतिक्रमणको विरोध गर्दा सरकारले तपाईँहरुलाई झन धन्यवाद दिनुपथ्र्यो तर गिरफ्तार गर्यो, यो आपत्तिजनक छ । हामीलाई हाम्रो माटोको माया छ । त्यसैले संगठगन विरोधमा उत्रेको छ” बिकले भने । उनले गिरफ्तार हुन तयार भएर सीमा अतिक्रमणविरुद्ध सडकमा उत्रेकोमा धन्यवाद दिए ।
