बझाङ । निर्माणाधीन कालंगा हाइड्रो प्रा.लिको सुरूङभित्र फसेका मजदुरमध्ये ३ जनाको शव फेला परेको छ ।
सोमबार उद्धारका लागि गएको सशस्त्र प्रहरीको विशेष टोलीले सुरुङको प्रवेशद्वारबाट करिब एक किमि पर ३ ओटा शव फेला पारेको हो । बुंगल नगरपालिकामा निर्माण भइरहेको सो हाइड्रोमा आइतबारदेखि ४ मजदुर फसेका थिए ।
अर्का एक मजदुरको अवस्था अझै अज्ञात रहेको जनाइएको छ । सशस्त्रको उद्धार टोलीले ३ शव फेलापारे पनि शव भने बाहिर निकालिएको छैन । निकाल्ने प्रयास जारी छ । उद्धारकार्य भइरहेको छ ।
सशस्त्र प्रहरी बल विपद व्यवस्थापन तालिम शिक्षालय कुरिनटारबाट ४ जना र दिपायलबाट ५ जना गरी ९ जनाको उद्धार टोली सोमबार दिउँसो घटनास्थल पुगेको थियो । आइतबार दिउँसो सुरूङभित्र पसेका ६ जना मध्ये २ जना आइतबारै बाहिर निस्किएका थिए ।
सुरूङभित्र गएका २ जना सास फेर्न गाह्रो भएपछि बाहिर निस्किएका र ४ जनाको अवस्था आइतबारदेखि अज्ञात रहेको थियो ।
सुरुङभित्र फस्नेमा दैलेखको गुराँस गाउँपालिका-३ घर भएका ३२ वर्षिय महेन्द्र शाही, सो ठाउँका कर्ण शाही, अछामको तुर्माखाँद गाउँपालिका-६ का २८ वर्षिय महेन्द्र साउँद र बझाङको बुंगल नगरपालिका-१ का ३५ वर्षिय शेरसिंह धामी रहेका छन् ।
घटनास्थलमा प्रमुख जिल्ला अधिकारी उमेश पाण्डेयसँगै नेपाल प्रहरी, सशस्त्र प्रहरी र नेपाली सेना खटिएका छन् । बझाङ सदरमुकाम चैनपुरबाट घटनास्थल पुग्न गाडीमा करिब ६ घण्टा लाग्छ ।
