सिन्धुली । आफ्नै श्रीमानले श्रीमतीलाई माछा तारेको तातो झोलमा डुबाउदा एक महिला गम्भीर घाइते भएकी छिन् ।
दुधौली नगरपालिका-४ डकाहाका ३० वर्षिय आशा सदा गम्भीर घाइते भएकी हुन् । श्रीमान रितु सदाले विनाकारण आशालाई कराईमा उम्लदै गरेको माछाको तातो झोलमा डुबाएका थिए ।
माछाको झोलमा डुबाएर अनुहार भरी पोलेपछि गम्भीर घाइते भएकी सदालाई श्रीमानले ढोका थुनेर कतै जान नदिई घरमा नै बन्दक बनाएका थिए । स्थानीय स्वास्थ्य संस्थामा समेत उपचार हुन नसकेपछि थप उपचारका लागि सिन्धुली अस्पताल लगिएको छ ।
सिन्धुली अस्पताल विकास समितिका अध्यक्ष प्रलाद पोख्रेलले खान बस्न र उपचार खर्च निःशुल्क रहेको जानकारी दिए । उनले भने,‘अत्यन्तै विपन्न रहेका सदाको उपचारका लागि अस्पतालले व्यवस्था गर्ने छ र यदि त्यतिले पनि पुग्दैन भने व्यक्तिगत रुपमा पनि सहयोग गर्न तयार रहेको बताए ।
उनको सिन्धुली अस्पतालमा उपचार हुन नसकेको खण्डमा मानवीय सेवामा काम गर्ने संस्थाहरु खोजिरहेको र उनलाई तत्कालै शिक्षण अस्पताल काठमाडौं लगेर उपचार गरिने व्यवस्था समेत मिलाएको बताए ।
अनुहारभरी पोलेकाले सिन्धुलीमा उपचार सम्भव नहुने चिकित्सकले बताएका छन् । श्रीमतीलाई घाइते बनाएर भागेका सदालाई प्रहरीले खोजी गर्दैछ ।
