काठमाडौं । क्रिष्टल प्यालेसलाई हराउँदै लेष्टर सिटी इङ्गलिस प्रिमियर लिग फुटबलको तेस्रो स्थानमा उक्लिएको छ ।
क्रिकष्ट प्यालेसको मैदानमा भएको खेलमा पाहुना टोली लेष्टर सिटी २-० ले जित्यो । खेलमा लेष्टर सिटीलाई विजयी गराउन सेग्लार सोयुन्चु र जेमी भार्डीले १-१ गोल गरे ।
जितसँगै लेष्टर सिटीले ११ खेलबाट २३ अंक जोड्दै तालिकाको तेस्रो स्थानमा रहेको चेल्सीलाई उछिनेको छ । दुवै टोलीको समान २३ अंक भएपनि गोल अन्तरको आधारमा लेष्टर तेस्रो तथा चेल्सी चौथो स्थानमा छ ।
शीर्ष स्थानको लिभरपुलको ३१ अंक छ । २५ अंकका साथ म्यान्चेस्टर सिटी दोस्रोमा छ । प्रिमियर लिग फुटबलकै अर्को खेलमा गएराती एभर्टन र टोटनह्याम हट्सपरले १-१ गोलको बराबरी खेले ।
टोटनह्यामका डेले अलीले पहिलो गोल गरे पनि एभर्टनका सेन्क टोसुनले इन्जुरी समयमा एक गोल फर्काउँदै खेल बराबरी गरेका हुन् ।
