News Portal

  • सुनकोशी नदीमा डुबेको बस तानेर बाहिर निकालियो

    २१० पटक

    काठमाडौं । चौतारा साँगाचोकगढी नगरपालिका-९ सुनकोशी नदीमा खसेको यात्रुवाहक बस तानेर बाहिर निकालिएको छ ।

    दोलखाको मागा देउरालीबाट काठमाडौं आउँदै गरेको बस नदीमा खसेपछि तत्कालै उद्धार थालिएको थियो । बस खसेको देखेपछि र्याफ्टिङ गरेर फर्किएकाहरु बोटसहित उद्धारमा जुटेका थिए ।

    उनीहरुले बस खसेपछि सुनकोशीले बगाउँदै गरेका केही यात्रुलाई पनि उद्धार गर्न सफल भएका छन् । नदीमा डुबेको बसलाई टुचिङले तानेपछि किनारमा निकालिएको छ ।

    उद्धारका क्रममा केही शव बगाएको प्रत्यक्षदर्शीले बताएका छन् । बा २ ख ७२४५ को बस सुनकोशीमा खसेको डिएसपी माधव काफ्लेले जानकारी दिए । अहिलेसम्म ५ जनाको शव झिकिएको छ ।

    करिब ८-९ जना घाइतेको उपचारको लागि धुलिखेल र खाडीचौर अस्पतालमा लगिएको उनले बताए । बसमा ३५ देखि ४० जना यात्रु सवार रहेको अनुमान गर्दा १२ भन्दा बढीको मृत्यु भएको हुनसक्ने अनुमान प्रहरीले गरेको छ ।

    मृतकको सनाखत हुन सकेको छैन । शव खोलाबाट निकाल्ने क्रम जारी छ । बस नदीमा पूरै डुबेको हुनाले सुरुमा उद्धारमा समस्या भएको थियो । नेपाल प्रहरी, सेना, सशस्त्र प्रहरी, र्याफ्टिङ गर्न गएका युवा र स्थानीयको सक्रियतमा उद्दार भइरहेको छ ।

    मृतकको संख्या अझै बढ्न सक्ने घटनास्थलबाट बलेफी गाउँपालिका–८ का वडाध्यक्ष चरीबहादुर तामाङले जानकारी दिएका छन् ।

    प्रतिकृया दिनुहोस्