काठमाडौं । सरकारले दुर्घटना तथा अन्य घटनाका कारण गम्भीर घाइते हुनेहरुको उपचारका लागि सातै प्रदेशमा ट्रमा सेन्टर खोल्ने भएको छ ।
स्वास्थ्य तथा जनसंख्या राज्यमन्त्री डा.सुरेन्द्रकुमार यादवले राष्ट्रिय ट्रमा सेन्टरको मातहतमा रहने गरी सबै प्रदेशमा ट्रमा सेन्टर स्थापना गर्ने तयारी गरिएको बताए ।
मुलुक संघीयतामा गइसकेकाले त्यही अनुसारको स्वास्थ्य संस्था स्थापना गर्न सरकार लागि परेको उनको भनाई छ । विश्व ट्रमा दिवसको अवसर पारेर बिहीबार काठमाडौंमा आयोजित एक कार्यक्रममा बोल्दै उनले सरकारले सबै प्रदेशमा स्वास्थ्य प्रयोगशालाहरुको स्थापनाको कामलाई सुरु गरेको जानकारी दिए ।
राज्यमन्त्री यादवले स्वास्थ्य क्षेत्रको विकासका लागि बजेट तथा जनशक्ति दुवैको अभाव रहेको पनि दोर्होयाए ।
उनले आवश्यक नीति नभएका कारण कतिपय स्वास्थ्य संस्थाहरु चाहेर पनि बनाउने अवस्थामा नरहेको स्पष्ट पारे । उनले वीर अस्पतालमा रहेको राष्ट्रिय ट्रमा सेन्टरलाई विश्वस्तरको सेवा, सुविधायुक्त बनाउने प्रतिवद्धता व्यक्त गरे ।
