काठमाडौं । सत्तारुढ नेपाल कम्युनिष्ट पार्टी (नेकपा) ले बडादसैं, तिहार, नेपाल संवत, छठलगायत पर्वका अवसरमा बुधबार भृकुटीमण्डपमा चियापान तथा शुभकामना आदान प्रदान कार्यक्रम गरिरहेको छ ।
मध्यान्ह १२ बजेदेखि सुरु भएको चियापान कार्यक्रममा अध्यक्षद्वय केपी शर्मा ओली र पुष्पकमल दाहाल प्रचण्डले शुभकामना मन्तब्य दिएका छन् ।
अध्यक्षद्वयले चियापानका लागि १ लाखलाई निमन्त्रणा कार्ड पठाएका थिए । जसमा दलका नेता, संवैधानिक तथा अन्य सरकारी अंगका प्रमुख, पत्रकार, नेपालस्थित विदेशी कूटनीतिज्ञ र नेकपाका कार्यकर्ता तथा सर्वसाधरणको भृकुटीमण्डपमा बाक्लो भीँड लागेको छ ।
नेकपाले शुभकामना कार्यक्रममा ५० हजार जना उपस्थित हुने अनुमान गरेको छ । नेकपाले पार्टीका नेता, कार्यकर्ता र सर्वसाधारणले भोलि अपराह्न १२ देखि ३ बजेसम्म चियापानको व्यवस्था गरेको छ ।
भीभीआईपी, भीआईपी, कूटनीतिक नियोगका अधिकारीसहितलाई दिउँसो ३ देखि ५ बजेसम्म समय तोकिएको छ । के छ खाजा शुभकामना कार्यक्रममा आउनेलाई नेकपाले चिया र खाजा व्यवस्था गरेको छ । चिया र खाजाको व्यवस्थापन आम्रपाली ब्याङ्क्वेटलाई दिइएको छ । नेकपाले भीआईपी र सर्वसाधणलाई चिया-खाजा कप र प्लेट फरक फरक राखिएको छ ।
सर्वसाधारण र नेकपाका नेता कार्यकर्तालाई प्लास्टिकको कप र प्लेटमा खाजा दिइएको छ । खाजाका परिकारमा केरासहितका फलफूल, लड्डु, बर्फी, निम्की र स्याण्डविच राखिएको छ ।
