काठमाडौं । गौशालामा रहेको भण्डारखाल जङ्गलमा मंगलबार बिहान खोटाङका एक महिला र एक पुरुषको झुण्डिएको अवस्थामा शव फेला परेको छ ।
खोटाङको दिक्तेल रुपाकोट मझुवागढी नगरपालिका-१० घर भएका काठमाडौंको बाँसबारी बस्दै आएका ४० वर्षिय जय गिरी र खोटाङको टेम्मा गाउँ बस्ने ३३ वर्षिय उमिता दमाईको शव मंगलबार बिहानसँगै रुखमा झुण्डिएको अवस्थामा फेला परेको महानगरीय प्रहरी वृत्त गौशालाले जनाएको छ ।
मर्निङ वाकमा निस्किएका स्थानीयवासीले दिएको सूचनाका आधारमा घटनास्थल पुग्दा दुवैको शव झुण्डिएको अवस्थामा फेला परेको बताइएको छ । घटनास्थलको प्रकृति मुचुल्का उठाइ दुवै शव परीक्षणका लागि महाराजगञ्ज शिक्षण अस्पतालमा लगिएको छ । उनीहरु दुवै जना खोटाङ कारागार बसेर निस्किएको बुझिएको छ ।
बाँसबारीमा परिवारसँगै बस्दै आएका गिरी मजदुरी गर्दथे । मंगलबार बिहान गिरीकी श्रीमती र छोरा प्रहरीको सम्पर्कमा आएका थिए । गिरी सोमबार बेलुका पशुपति घुम्न जान्छु भनेर निस्किएको श्रीमतीको भनाइ उद्धृत गर्दै प्रहरी निरीक्षक राउतले भने ।
खोटाङ बस्दै आएकी दमाई काठमाडौं आएको कारण भने खुलेको छैन । उनी काठमाडौं दिदी-भिनाजु कहाँ बसेको पाइएको प्रहरीले जनाएको छ ।
