काठमाडौँ । मनसुन कमजोर अवस्थामा रहेकाले पानी पर्न नसकेको जल तथा मौसम पूर्वानुमान महाशाखाले जनाएको छ । मनसुन भित्रएको भए पनि कमजोर अवस्थामा रहेकाले पानी पर्न नसकेको मौसमविद राजु प्रधानाङ्गले बताए ।
न्यून चापीय रेखा मध्य भारततिर रहेकाले नेपालमा मनसुन कमजोर भएको हो। केही दिनमा उक्त रेखा बिस्तारै माथि जाने र नेपालतिर आएपछि मनसुन सक्रिय हुने बताइएको छ ।
झरी पर्ने खालको वर्षाका लागि केही दिन पर्खनु पर्ने अवस्था रहेको मौसमविद प्रधानाङ्गले बताएका छन् । देशभर मौसम बदली भए पनि पानी त्यति पर्न नसक्नुको कारण न्यून चापीय रेखा नेपाल नजिक नहुनु रहेको उनले बताए ।
बुधबार देशभरको मौसम सामान्यत बदली हुने तर पानी भने थोरै ठाउँमा मात्रै पर्ने बताइएको छ । दिनभरजसो मौसम बदली र खुल्ने क्रम जारी रहने छ ।
