काठमाडौं । साउदी अरेबियाको अभा अन्तर्राष्ट्रिय विमानस्थलमा विद्रोहीहरुले आक्रमण गरेका छन् ।
उक्त आक्रमणबाट ९ जना सर्वसाधारण घाइते भएका छन् । यमनका विद्रोही विरुद्ध संघर्षरत साउदी गठबन्धनका प्रवक्ता कर्णेल तुर्की अल मलिकीले घाइतेमध्ये ८ जना साउदी नागरिक रहेको जानकारी दिएका छन् ।
अर्का घाइते व्यक्ति भारतीय नागरिक रहेको जनाइएको छ । प्रवक्ता मलिकीका अनुसार घाइतेहरु सबैलाई उपचारका लागि स्थानीय अस्पतालमा भर्ना गरिएको छ । यो विमानस्थलमाथि हुथी विद्रोहीहरुले पटक-पटक आक्रमण गर्ने गरेका छन् ।
गत महिना भएको यस्तै आक्रमणमा एक जना सिरियाली नागरिकको ज्यान गएको थियो भने अरु ७ जना घाइते भएका थिए । प्रवक्ता अल मलिकीले अन्तर्राष्ट्रिय मानवीय कानुन बमोजिम सुरक्षित गरिएका निहत्था नागरिकमाथि नै हुथी विद्रोहीले आक्रमण गरिरहेको उल्लेख गर्दै नागरिक र उनीहरुको सम्पत्ति सुरक्षाका लागि गठबन्धनले हुथी विद्रोहीविरुद्ध जस्तो सुकै कारबाही गर्न सक्ने चेतावनी दिए ।
पछिल्ला दिनहरुमा साउदी अरेबियाका दक्षिणी क्षेत्रमा रहेका विमानस्थलहरुमा हुथी विद्रोहीहरुले मानवविहीन बिमान (ड्रोन) बाट आक्रमण गरिरहेका छन् ।
