काठमाडौं । जोरपाटीस्थित समता अस्पतालमा कार्यरत रामेछापकी विमला तामाङको मृत्युका विषयमा ३ जना महिलामाथि अनुसन्धान थालिएको छ ।

प्रहरी परिसर टेकुले आज उनीहरु विरुद्ध अभद्र व्यवहारको मुद्दासहितको फाइल काठमाडौं जिल्ला अदालतमा दर्ता गरेको छ । मृतक विमला तामाङको खल्तीमा भेटिएको सुसाइड नोटमा नाम उल्लेख गरिएकी ३ जना विरुद्ध मुद्दा दायर गरिएको हो ।

जसमा समता अस्पतालका सञ्चालक उत्तम सञ्जेलकी पत्नी कला संजेलसहित ३ जना रहेका छन् । नियमित काममा गएकी विमला कार्यालय समयपछि घर नआएको र विगत केही सातादेखि ताला लगाएको कोठामा झुन्डिएको अवस्थामा फेला परेकी थिइन् ।

उनले आत्महत्या गरेको पोष्टमार्टम रिपोर्टबाट खुलेको छ । सहमति नभएसम्म शव नबुझ्ने अडान लिएको परिवारले अस्पताल प्रशासनले मृतकका बालबालिकाको पालनपोषणको र दोषी भनिएकाहरुमाथि कारबाहीको विषयमा सहमति गरेपछि उनको दाह संस्कार गरिएको छ ।