काठमाडौं । भारतबाट नेपालतर्फ आउँदै गरेका एक नेपाली युवा विष्फोटक पदार्थसहित भारतको पानीटेंकीमा पक्राउ परेका छन् ।
पानीटेंकीबाट काँकडभिट्टा नाकातर्फ प्रवेश गर्न लागेका भोजपुर-९ खैराङका ३३ वर्षिय श्रीप्रसाद राईलाई भारतीय प्रहरीले पक्राउ गरेको हो ।
पानीटेंकी नाकामा खटिएका भारतीय सीमा सुरक्षा बल (एसएसबी) को टोलीले उनलाई विष्फोटक पदार्थसहित पक्राउ गरेको हो । उनको साथबाट विष्फोटक पदार्थ नियोजेल (९०) को ४० प्याकेट, १०० थान विद्युतीय डेटोनेटर, नेपाली नागरिकताको परिचयपत्र, मोबाइल फोनलगायतका सामग्री बरामद गरिएको एसएसबीले जनाएको छ ।
उनी मेघालयको सिलङबाट नेपाल फर्कंदै थिए । सिलोङमा अध्ययनरत छोरीलाई भेट्न गएर फर्किएको उनले भारतीय प्रहरीलाई बताउँदै आएका छन् ।
उनले बोकेको कालो झोला चेकजाँच गर्दा विष्फोटक पदार्थ फेला परेको एसएसबीका कमाण्डर राजीव राणाले बताए । उनलाई आवश्यक कारबाहीका लागि खोडीबारी पुलिस थाना बुझाइएको छ । उनी पक्राउ परेकोबारेमा एसएसबीले आफूलाई जानकारी गराइसकेको इलाका प्रहरी कार्यालय काँकडभिट्टाले जनाएको छ ।
