काठमाडौं । इरानका राष्ट्रपति हसन रुहानीका भाइ हुसेन फेरेडोउनलाई अनिश्चितकालीन जेल सजायको फैसला भएको छ ।
भ्रष्टाचारको अभियोगमा उनलाई सजाय स्वरुप अनिश्चितकालीन जेल सजायको फैसला सुनाइएको अन्तर्राष्ट्रिय सञ्चारमाध्यम अल जजिराले जनाएको छ ।
“कतिपय आरोपमा उनीबाट गल्ती नभएको देखियो, तर अरु धेरै आरोपहरु पुष्टि भएकाले उनलाई कारागार राख्न आदेश दिइएको छ,” अदालतका एक जना कर्मचारी हमिद्रेज होसेनीले बताएका छन् ।
सन् २०१५ मा भएको आणविक सम्झौतामा राष्ट्रपतिको विश्वास पात्रका रुपमा हुसेन संलग्न रहेका थिए । उनले आफूविरुद्ध लागेको अभियोगको अस्वीकार गर्दै माथिल्लो अदालतमा जाने जानकारी दिएका छन् । उनले आफूलाई पूर्वाग्रहीपूर्ण तरिकाले फसाउन लागिएको आरोप लगाएका छन् ।
