काठमाडौं । अफगानिस्तानको दक्षिण प्रान्त कान्दाहारमा रहेको एक प्रहरीचौकीमा भएको झडपमा ३ प्रहरीसहित १७ जना लडाकु मारिएका छन् ।
आज (शनिबार) तालिबान लडाकू र सुरक्षाकर्मीबीच भएको झडपमा परी ३ प्रहरीसहित १७ जना लडाकू मारिएको प्रान्तीय प्रहरी प्रमुखले बताएका छन् ।
कान्दाहार प्रान्तको प्रान्तीय शहर कान्दाहारको स्पिन बोल्दाक जिल्लामा रहेको एक प्रहरी चौकीमा शनिबार बिहान तालिबान लडाकू समूहले गरेको आक्रमणको सुरक्षा बलले गरेको जवाफी कारबाहीमा १४ तालिबान लडाकू मारिएका छन् ।
सुरक्षा अधिकारी र तालिबान लडाकूबीच भएको झडपमा परी ३ सुरक्षा अधिकारीको पनि मृत्यु भएको छ । झडपमा परी ४ सुरक्षा अधिकारी र ७ तालिबान लडाकू घाइते भएका छन् ।
तालिबान लडाकू समूहको बलियो पकड रहेको कान्दाहार प्रान्तमा केही समय यतादेखि सुरक्षा व्यवस्थामा सुधार भएको बताए पनि तालिबान आतङ्ककारी समूहले यस प्रान्तमा बारम्बार आक्रमण गर्दै आएका छन् ।
