काठमाडौं । किंग्स इलेभेन पन्जाबलाई पराजित गर्दै कोलकाता नाइट राइडर्स इन्डियन प्रिमियर लिग (आइपीएल) क्रिकेटको ‘प्लेअफ’ नजिक पुगेको छ ।
शुक्रबार राति भएको खेलमा कोलकाताले पन्जाबलाई ७ विकेटले पराजित गरेको हो । कोलकाताले पाएको १८४ रनको लक्ष्य १८ ओभरमा मात्र ३ विकेट गुमाएर पूरा गरेको छ । सुभम् गिलले ‘नटआउट’ ६५ रन बनाएको इनिङ्समा क्रिस लिनले ४६ रन जोडेका थिए ।
रोबिन उथप्पा २२ र आन्द्रे रसेलले २४ रनको योगदान गरेका दिएका छन् । यसअघि, टस हारेपछि पहिले ब्याटिङमा निम्त्याइएको पन्जाबले निर्धारित २० ओभरमा ६ विकेट गुमाएर १८३ रन बनाएको थियो ।
पन्जाबका लागि साम कुरानले अविजित रहँदै सर्वाधिक ५५ रन बनाएका थिए । निकोलस पोरानले ४८ रन बनाएको इनिङ्समा मायांका अग्रवालले ३६ रन जोडे । कोलकाताका सन्दीप वारियरले २ विकेट लिए ।
जितपछि कोलकाताले अघिल्लो चरण पुग्ने सम्भावनालाई जीवित राखेको छ । पन्जाब भने प्रतियोगिताबाटै बाहिरिएको छ । समूह चरणमा एक खेल हुन बाँकी छ । चेन्नाई सुपर किंग्स, मुम्बई इन्डियन्स र दिल्ली क्यापिटल्स यसअघि नै प्लेअफमा प्रवेश गरिसकेका छन् ।
