अनलाइन डबली
काठमाडौँ । दुई हप्तासम्म लगातारको बमबारीले पनि इरानलाई घुँडा टेकाउन नसकेपछि अन्ततः अमेरिका आफै पछि हटेको छ । १४ बुँदे शान्ति सम्झौताको उलंघन गरेर अमेरिकाले इरानमाथि भिषण हवाई हमला गरेको थियो ।
इरानले कडा जवाफ फर्काउँदै मध्यपूर्वमा रहेका अमेरिकी सैन्य शिविर र लगानीमाथि लगातार जवाफी हमला जारी राखेको थियो । ‘जस्तो हमला उस्तै जवाफ’ भन्दै इरानले पनि अमेरिकी सेनाको ठूलो क्षति पुर्याएको समाचार अन्तर्राष्ट्रिय संचारमाध्यमहरुले सार्वजनिक गरेका थिए ।
यसैबीच अमेरिकी राष्ट्रपति डोनाल्ड ट्रम्पले इरानमाथिको अमेरिकी सैन्य आक्रमण तत्कालका लागि रोक्न आदेश दिएका छन् ।
अन्तर्राष्ट्रिय संचारमाध्यमहरुका अनुसार एकतर्फी युद्धविराम उलंघन गरेर लगातार बमबारी गरेको १४ औं दिनमा ट्रम्पले इरानमाथि थप हमला गर्ने योजना स्थगित गरेका हुन् ।
द न्युयोर्क टाइम्सका अनुसार मध्यपूर्वमा अमेरिकी सेनासँग रहेका प्याट्रियट क्षेप्यास्त्र प्रतिरक्षा प्रणालीका अवरोधक मिसाइल तथा अन्य हवाई प्रतिरक्षा हतियारको मौज्दात सकिएपछि ट्रम्प प्रशासनले यो निर्णय लिएको हो । शुक्रबार ट्रम्प, उनका प्रमुख सल्लाहकार तथा मन्त्रिपरिषद्का वरिष्ठ सदस्यहरूबीच भएको बैठकपछि उक्त निर्णय गरिएको समाचारमा उल्लेख छ ।
