हुम्ला । नेपाली कम्युनिस्ट पार्टी(नेकपा)का उम्मेदवार डा.दीपेन्द्र रोकायाले आफ्नो पार्टीले निर्वाचनलगत्तै गाउँगाउँ जाने निर्णय गरेको बताएका छन् । आइतबार सदरमुकाम सिमिकोटमा पार्टीको बैठक बोलाएर नेता–कार्यकर्तालाई चुनावी परिणाम आफ्नो पक्षमा नआए पनि निरशा भन्दा थप सुदृढ हुनुपर्नेसमेत बताएका छन् ।

निर्वाचनको मतपरिणाम आफ्नो पक्षमा नआए पनि सबै पालिकाहरुमा पुगेर आफ्ना मतदाताहरुलाई धन्यवाद दिन आफूहरु हरेक पालिकामा पुग्ने डा.रोकायाले अनलाईन डबलीलाई बताए । लोकतान्त्री पद्धतिमा हारजित स्वभाविक रहेको र आफू कत्ति पनि निराश नरहेको उनको भनाई छ । “मेरा प्रतिद्वन्दी नेपाली काँग्रेसका उम्मेदवार जयपति रोकायाज्यूलाई म हार्दिक बधाई तथा सफल कार्यकालको शुभकामना व्यक्त गर्न पनि चाहन्छु, साथै हुम्लाको विकास र जनताको समृद्धिका लागि हामी सहकार्य गरेर अघि बढ्ने हो”, डा.रोकायाले भने ।

चुनावी अभियानमा खटेर मतपरिणाम नआउन्जेलसम्म खटेर सहयोग गर्ने नेता तथा कार्यकर्ताहरुलाई धन्यवाद बैठक बोलाएको बताउँदै रोकायाले भने,“हामीले सोचे जस्तो परिणाम हातबाट गुमे पनि ‘एउटा माघले जाडो सकिदैन’ फेरी पनि चुनाव नै सबै थोक पनि हैन हाम्रो हुम्ली जनताप्रतिको भूमिका निरन्तर छ, त्यसैले यो अभियान चलाउँदै छौं ।”

सोमबारबाटै मतदातालाई धन्यबाद अभियान चलाउने जसका लागि हरेक पालिकामा पुगेर जनतासँग भलाकुसारी गर्ने योजान रहेको रोकायाले बताए ।