अनलाइन डबली
मुगु । प्रतिनिधिसभा निर्वाचनको मतदान भइरहँदा मुगुको सोरु गाउँपालिका–८ स्थित बालज्योति माध्यमिक विद्यालय, गिलाहा मतदान केन्द्र नजिकै भेटिएका दुईवटा बम नेपाली सेनाले निस्क्रिय गरेको छ ।
निर्वाचन बुथ नजिकै दुई छुट्टाछुट्टै स्थानमा शङ्कास्पद वस्तु ९बम० फेला परेपछि मतदान प्रक्रियामा केही समय अवरोध सिर्जना भएको थियो ।
खबर प्राप्त हुनासाथ घटनास्थल पुगेको नेपाली सेनाको टोलीले ती बमहरूलाई सुरक्षित रूपमा निष्क्रिय ९डिस्पोज० पारेको छ । सुरक्षा निकायले उक्त क्षेत्रलाई अहिले नियन्त्रणमा लिएर थप अनुसन्धान गरिरहेको छ ।
बम भेटिएपछि सोरु क्षेत्रका सर्वसाधारणमा त्रास फैलिएको छ । स्थानीय बासिन्दा धर्मराज शाहीका अनुसार बम विष्फोटको डरले गर्दा मतदान केन्द्रमा मतदाताहरूको उपस्थिति निकै न्यून देखिएको छ ।
‘बिहानैदेखि बमको खबरले गाउँलेहरू डराएका छन्, जसका कारण मतदान केन्द्रमा न्यून संख्यामा उपस्थिति देखिएको छ,’ शाहीले जानकारी दिंदै भने ।
उक्त क्षेत्रका अन्य केही स्थानहरूमा पनि शङ्कास्पद वस्तु राखिएको हुनसक्ने अपुष्ट खबरहरू आएपछि सुरक्षा निकायले निगरानी बढाएको छ ।
जिल्ला प्रशासन कार्यालय मुगुले सुरक्षा व्यवस्था कडा पारिएको र निर्धक्क भएर मतदान गर्न नागरिकहरूलाई आग्रह गरेको छ ।
