अनलाइन डबली
काठमाडौं । भक्तपुर निर्वाचन क्षेत्र नं. २ बाट उम्मेदवारी दिएका पत्रकार जन्मदेव जैसीले भक्तपुरलाई इतिहास, संस्कृति र श्रमको शहरका रूपमा चित्रण गर्दै अझै पनि आधारभूत समस्या समाधान हुन नसकेको बताए ।
उम्मेदवारी दर्तापछि उनले भक्तपुरमा पानी र ढल व्यवस्थापनको समस्या यथावत् छ, युवालाई आफ्नै ठाउँमा रोजगारीको अवसर नपाएको, विकासको नाममा सम्पदा र खेती नष्ट हुँदै गइरहेको बताउँदै भक्तपुरका जनताको आवाज संसदसम्म प्रभावकारी रूपमा पुर्याउन आफूले उम्मेदवारी दिएको बताए । उनले भक्तपुरका जनताका समस्याको समाधानका लागि आफू प्रतिनिधिसभा निर्वाचनमा होमिएको भन्दै जैसीले मतदातालाई ‘आँखा’ चिन्हमा मतदान गर्न अपील समेत गरे ।
प्रगतिशील लोकतान्त्रिक पार्टी (प्रलोपा)बाट उम्मेदवारी दर्ता गराएका जैसीले लामो समयदेखि पत्रकार क्षेत्रमा रहेर श्रमजीविका पक्षमा संघर्ष गर्दै आएका थिए । उनि हाल श्रमजीवी पत्रकार संघ नेपालका अध्यक्ष समेत हुन् ।
जैसीले अब आँखा चिम्लेर होइन, आँखा खोलेर राजनीति गर्ने समय आएको उल्लेख गर्दै समस्या देख्ने र समाधान खोज्ने राजनीतिको आवश्यकता औँल्याएका छन् ।
