मितिः २०८२÷०४÷२७
प्रेस विज्ञप्ति

नेपाल वायुसेवा निगमको साखमा आँच आउने गरी विभिन्न सञ्चार माध्यमबाट प्रकाशित भएको “काठमाडौं र साउदीमा कामदार अलपत्र छाडेर अध्यक्ष लिन निगमको जहाज हङकङ” भन्ने आशयकोे समाचार तथ्यहीन, भ्रामक र दुष्प्रचारजन्य भएको हुनाले उक्त समाचारबाट आम जनमानसमा सिर्जना भएको भ्रम निवारण गर्न तथा यथार्थ जानकारी दिने उद्देश्यले यो प्रेस विज्ञप्ति जारी गरिएको छ ।

१. निगमको जहाज नियमित उडान तालिकाअनुरुप हङकङ उडान गरिएको विषयलाई विषयान्तर गरी निगम अध्यक्ष लिन हङकङ उडान गरिएको भन्ने तथ्यहीन समाचारप्रति निगम दुःख व्यक्त गर्दछ ।

२. निगमको एउटा जहाजमा प्राविधिक समस्या आउँदा काठमाडौं–दम्माम सेक्टरको उडान रद्ध गरिएको थियो र उक्त सेक्टरको यात्रुहरूलाई निगमकै खर्चमा अन्तर्राष्ट्रिय उड्डयन संस्थाको नियमानुसार बासको सुविधा उपलब्ध गराइएको थियो । साथै उक्त सेक्टरमा होल्ड भएका यात्रुहरूलाई अर्को दिन वैकल्पिक उडानमार्फत् गन्तव्यमा पु¥याउने व्यवस्था समेत गरिएको थियो ।

३. निगमको जहाज नियमित तालिकाअनुरुप उडान गर्दैगर्दा बिचमा अचानक प्राविधिक समस्या आएको कारणले कुनै न कुनै सेक्टरको उडान अवरुद्ध हुने परिस्थितिमा तत्काल उडान भर्ने दम्माम सेक्टरनै रद्ध हुन गएको थियो ।

४. निगमले आफ्नो उडान तालिकाको प्रभावकारिता कायम गर्न एउटा उडान स्थगित भएपछि अर्को उडानलाई असर नगर्ने हेतुले हङकङ उडान संचालन गरेको हो । उक्त दिनको उडानमा निगमका कार्यकारी अध्यक्ष लगायतका टोली फर्किने संयोग मात्र परेको हो ।

५. निगमका कार्यकारी अध्यक्ष नेतृत्वको टोलीको हङकङ भ्रमण निगमको उडान सेवा विस्तार, बजार सुदृढीकरण, कार्गाे तथा यात्रु सेवा सुधार र स्थानीय सरोकारवालासँग प्रत्यक्ष छलफल गर्न औपचारिक रूपमा एक महिना अगाडि स्वीकृत योजनाअनुसार नेपाल–हङकङ उडानको ४३ औँ वर्षगाँठको उपलक्ष्यमा सम्पन्न भएको थियो । उक्त कार्यक्रममा कार्गाे ट्रयाकिङ्ग सिस्टम, उडान ढिलाइ तथा रद्द हुने समस्या समाधान, वाइडबडी जहाजको प्रभावकारी प्रयोग गर्ने विषयमा हङकङस्थित सरोकारवाला ट्राभल एजेन्सी तथा नेपाली समुदायसँग प्रत्यक्ष छलफल भएको थियो ।

६. हङकङ भ्रमणमा सहभागी निगमका कार्यकारी अध्यक्ष युबराज अधिकारी, मार्केटिङ डाइरेक्टर टंकनिधि दाहाल र सिनियर पाइलट विजय लामाको उपस्थिति बजार वृद्धि गराउन तथा जनगुनासो सम्बोधन गरी व्यावसायिक आवश्यकता पूरा गर्न केन्द्रित थियो र सो कार्यक्रममा सहभागी हुँदा अनधिकृत सहभागिताको हल्ला चलाउनु निराधार र दुर्भावनापूर्ण छ । निगम कार्यकारी अध्यक्षको भ्रमण पूर्ण रूपमा स्वीकृति प्राप्त, नियमअनुरूप र व्यावसायिक आवश्यकताबाट निर्देशित थियो । नेपाल–हङकङ उडानको ४३ औँ वर्षगाँठको उपलक्ष्यमा सम्पन्न भएको कार्यक्रम “हङकङ–नेपाल उडान राष्ट्रिय ध्वजावाहक नेपाल वायुसेवा निगमबाट गरौँ” भन्ने नाराका साथ भव्यरुपमा कार्यक्रम सम्पन्न भएको थियो ।

७. कार्यकारी अध्यक्ष हङकङ पुगेका बेला त्यहाँस्थित नेपाली साहित्यानुरागीहरूले आयोजना गरेको कार्यक्रममा बिदाको दिन छोटो समय सहभागी हुनभएको विषयलाई गलत तरिकाले व्याख्या गरिएको निगम स्पष्ट पार्दछ ।

राष्ट्रिय ध्वजावाहक नेपाल वायुसेवा निगमको छविमा आँच पु¥याउने नियतले लेखिएका यस्ता समाचारप्रति निगमको गम्भिर ध्यानकर्षण भएको छ । निगमसम्बन्धी समाचार प्रकाशित गर्दा निगमको आधिकारिक स्रोत प्रवक्तामार्फत् तथ्य पुष्टि गर्न सञ्चारमाध्यमलाई निगम अनुरोध गर्दछ । निगम सदैव पारदर्शिता, पेशागत मर्यादा र यात्रुहरूको हित तथा हवाई सुरक्षालाई प्राथमिकता दिंदै अघि बढिरहेको छ ।

मनोज कुमार साह सुवास डाँगी
प्रवक्ता (प्रा.) प्रवक्ता
नेपाल वायुसेवा निगम नेपाल वायुसेवा निगम