काठमाडौं । सवारी साधनसम्बन्धी विभिन्न सेवा एकै थालोमा उपलब्ध गराउने उद्देश्यले ‘सि–कार’ सञ्चालनमा आएको छ । विहीबार काठमाडौंमा नेपालकै पहिलो यस प्रकारको स्वरुप सञ्चालनमा आएको हो ।

नयाँ तथा सेकेन्ड ह्याण्ड गाडीको साथै, एस्सेसरिज पसल, चार्जिङ स्टेसन र क्याफेलगायत विभिन्न सुबिधा एकै स्थानमा उपलब्ध गर्न सकिन्छ । सबै प्रकारको ग्राहकलाई हेरेर यो स्वरुपको स्थापना गरिएको सि कारका संस्थापक रोशन घिमिरेले बताएका छन् ।

उनले भने, ‘सि कार भनेको गाडी किनबेचको नयाँ ठेगाना भनेर बुझ्दा हुन्छ । अटो क्षेत्रमा रहेका सम्पूर्ण स्टेक होल्डरहरु जस्तो– क्रेता विक्रेता, वर्कसप, बिमा कम्पनी सबैलाई हुने गरेर एउटा स्थान बनाएका छौ । सि कारभित्र आएपछि एउटै छानामुनि नयाँ र पुराना गाडी किनबेच, चार्जिङको सुविधा, एस्सेसरिज र क्याफेलगायत धेरै सुविधा यहाँ प्रदान गर्दै छौ ।’

उनले  नेपालको सन्दर्भमा एउटा नयाँ काम गर्ने प्रयास गरेको भन्दै आवश्यकता अनुसार उनीहरुलाई सुविधा दिने हिसाबले सबै कामहरु गरेक बताए ।

उनले भने, ‘गाडीको मर्मत गर्नको लागि पनि वर्कसपहरु छन्, कसैलाई चलाउन डर लाग्छ भने उहाँको लागि चालकको व्यवस्था पनि गरेका छौ । यो नेपालको सन्दर्भमा एउटा नयाँ प्रयास पनि हो । ग्राहकको आवश्यकता अनुसार उहाँहरुलाई सुविधा दिने हिसाबले सबै कामहरु गरेका छौ ।’

उनका अनुसार मोबाइल चार्जिङको सेवा भन्नाले बाटोमै चार्ज गर्न सक्ने खालको क्षमता भएको इलेक्ट्रिक गाडीको पनि व्यवस्था गर्ने प्रयास भइरहेको छ । १० करोडको लगानीमा चार रोपनी क्षेत्रमा फैलिएको सि कारमा करिब ५० जनाले रोजगारी पाएका छन् र यस्तो खालको व्यवसायलाई नेपालको १४ वटा जिल्लाहरुमा विस्तार गर्ने योजना पनि रहेको छ ।

उनले भने, ‘सि कारलाई काठमाडौं बाहिर बिस्तार गर्ने विषयमा हामीले आउने आर्थिक वर्षमा तीनवटा ठाँउहरुमा यसको स्थापना गर्न छनोट गरिसकेका छौ भने त्यो तीनवटा मोडलको सफलता असफता, प्रगती हेरेर आउने समयमा अरु क्षेत्रमा कसरी अगाडि बढ्ने भनेर निर्धारण गर्छौ ।’

अटो मोबाइल क्षेत्रमा दर्ता गर्ने हिसाबले चुनौतीपूर्ण नभएपनि लगानी, बजारमा भएको अस्वस्थ प्रतिस्पर्धा, धेरै मात्रामा प्रतिस्पर्धी र आर्थिक मन्दिका कारण केही चुनौतीहरु भएको पनि उनको भनाइ छ ।

साथै, यो क्षेत्रलाई आवश्यक भएको दक्ष जनशक्तिको कमि हुनुपनि प्रमुख चुनौतीको रुपमा देखा परेको पनि उनको भनाइ छ ।

उनले भने, ‘अटो मोबाइल क्षेत्रमा गाडी किनबेच गर्ने कुरा दर्ता गर्ने हिसाबले चुनौती पूर्ण छैन् । तर पनि लगानीको हिसाबले बजारमा भएको अस्वस्थ प्रतिस्पर्धा र धेरै मात्रामा प्रतिस्पर्धीहरु भएको हुनाले र आर्थिक रुपमा पनि मन्दि भएको कारणले केही चुनौतीहरु छ । अर्को चुनौती भनेको दक्ष जनशक्तिको कमि पनि हो । यो क्षेत्रमा जुन किसिमको सिप र दक्षता हामीलाई चाहिन्छ त्यो सिप नेपालमा अभाव नै छ ।’

उनले सरकारले यो क्षेत्रको विस्तारको लागि गर्नुपर्ने प्रमुख कार्य नीतिगत रुपमा सहजिकरणको साथै आयातको क्षेत्रमा देखा परेको चुनौतीहरुलाई सम्बोधन गर्नु रहेको पनि उल्लेख गरेको छ ।

कम्पनीका अनुसार पछिल्लो समय विद्युतीय सवारीमा अत्यधिक रुचाइएको विवाइडीको नयाँ शोरुमले ग्राहकलाई सहज हुनेछ । साथै सि–कारमा विभिन्न ब्राण्डका सेकेन्ड ह्यान्ड सवारी साधन पनि उपलब्ध हुनेछन् ।

शुभारम्भका अवसरमा महानायक राजेश हमालले सवारी साधन सम्बन्धी एकै थलोमा विभिन्न सेवा उपलब्ध हुनुले ग्राहकको समय र खर्च दुवै बचत हुने भएकाले लाभदायी भएको प्रतिक्रिया दिए ।

ग्राहकले सेकेन्ड ह्यान्ड सवारी खरिद गर्नुका साथै एक्सचेञ्जका पनि सुविधा पाउनेछन् । कम्पनीले सवारी खरिदबिक्रीका साथै सि–कार परिसरमा चार्जिङ स्टेसन पनि सञ्चालनमा ल्याएको छ । जहाँ एकै साथ ९१५० भन्दा बढी विद्युतीय सवारी चार्ज गर्न सकिनेछ ।

कम्पनीले यसका लागि दु्रत गतिमा चार्ज हुने सुविधा ल्याएको छ । ग्राहकले सि–कार परिसरमै रहेको इटालियन रेस्टुरेन्टको मज्जा लिन सक्नेछन् । त्यति मात्रै होइन, सि–कारमा सवारी साधनका स्पेयर पार्टस् पनि सुलभ मूल्यमै उपलब्ध हुनेछन् ।

कम्पनीले ग्राहकलाई अधिकतम सेवा दिने उद्देश्यले सेकेन्ड ह्यान्ड सवारी बिक्री गरेको तीन महिनासम्मको प्राविधिक रुपमा सम्पूर्ण जिम्मेवारी लिनेछन् ।

साथै कम्पनीले ग्राहकलाई अझ बढी सेवा दिने उद्देश्यले बिलबुक निस्शुल्क नवीकरण सुविधा पनि ल्याएको छ । सि–कारमार्फत सवारीको बीमा गर्नेले बिलबुक नवीकरणको पनि सुविधा पाउनेछन् । जसका लागि उनीहरुले कुनै पनि अतिरिक्त शुल्क तिर्नुपर्दैन ।

कम्पनीले ग्राहकहरुलाई सहज सेवा दिने उद्देश्यले सदस्यता योजना पनि ल्याएको छ । विभिन्न वर्गीकरणका सदस्यता योजनामा सि–कारमा उपलब्ध कुनै पनि सेवा उपयोग गर्दा निश्चित प्वाइन्ट प्राप्त हुन्छ भने विभिन्न सेवामा आकर्षक छुट पनि पाउने कम्पनीको भनाइ छ ।