अनलाइन डबली
काठमाडौँ । सुदूरपश्चिम प्रदेशका धेरै ठाउँमा आइतबारदेखि लगातार भारी बर्षा भइरहेको छ । जल तथा मौसम विभागका अनुसार तराईका बेलौरी, कृष्णपुर र धनगढी क्षेत्रमा अत्यधिक पानी परिरहेकाले डुबानको जोखिम बढेको छ। स्थानीय बासिन्दालाई सतर्क रहन सुरक्षाकर्मीहरूले आग्रह गरेका छन्।
कञ्चनपुर जिल्लाका अधिकांश स्थानमा लगातार पानी परिरहेको छ । त्यस्तै डडेल्धुराको जोगबुढा क्षेत्र, डोटी र कैलालीका चुरे क्षेत्रमा पनि भारी बर्षा भइरहेको छ । पहाडका अन्य जिल्लाहरुमा पनि लगातार बर्षा भइरहेको छ ।
पहाडमा परेको वर्षाले त्यहाँबाट बग्ने खोलानदीमा पानीको बहाव बढेको छ।
स्थानीय प्रशासन र सुरक्षाकर्मीहरू उच्च सतर्कताका साथ परिचालनमा छन्। नागरिकहरूलाई नदी किनार, खोला आसपास र डुबान हुने स्थानहरूमा नजान आग्रह गरिएको छ।
बर्षाका कारण अहिलेसम्म बाढी र पहिरो आएर क्षति नपुगेको प्रहरीले जनाएको छ । तर, आवश्यक सतर्कता अपनाउन स्थानीय प्रशासनले आग्रह गरेको छ ।
मौसम पूर्वानुमान महाशाखाले पनि सुदूरपश्चिमका पहाडी तथा तराई भू–भागमा अझै केही समय वर्षा जारी रहने पूर्वानुमान गरेको छ। महाशाखाले जोखिमयुक्त क्षेत्रका बासिन्दालाई आवश्यक सतर्कता अपनाउन अनुरोध गरेको छ।
