काठमाडौँ । सुन चांदी बजार पाँचौ दिनमा आज बन्द रहेको छ । सरकारले आगामी आर्थिक वर्ष २०८२/८३ को आर्थिक विधेयकमार्फत सुनमा विलासिता शुल्क र हिरामा मूल्य अभिवृद्धि कर (भ्याट) लागू गरेपछि सुन व्यवसायीहरूले आन्दोलन स्वरूप ब्यबसाय बन्द गरेका हुन् । सरकारले आर्थिक विधेयकमार्फत सुनमा विलासिता कर लगाएको छ । यस्तै हिरामा १३ प्रतिशत मूल्य अभिवृद्धि कर लगाएको छ । गएको अगाडी आइतबार सुनचाँदी गहनामा लगाइएको विलासिता कर फिर्ता लिन माग गर्दै केही सुनचाँदी व्यवसायीहरूले काठमाडौँमा प्रदर्शन गरे ।
सुनका गहनामा प्रयोग हुने बहुमूल्य पत्थर र हिरामा लागू गर्न खोजिएको १३ प्रतिशत मूल्य अभिवृद्धि कर (भ्याट) खारेज हुनुपर्ने आफूहरूको माग रहेको नेपाल सुनचाँदी व्यवसायी महासंका निवर्तमान अध्यक्ष मानिकरत्न शाक्यले बताएका छन् ।
यसै गरि नेपाल उद्योग वाणिज्य महासंघले आर्थिक वर्ष २०८२/०८३ को बजेटमार्फत् प्रस्तावित दुई प्रतिशत विलासिता कर र १३ प्रतिशत मूल्य अभिवृद्धि कर अव्यावहारिक भएको भन्दै सुनमा लगाइएको विलासिता कर र हिरालगायत बहुमूल्य पत्थरमा लगाइएको मूल्य अभिवृद्धि कर (भ्याट) पुनरावलोकन गर्न सरकारसँग माग गरेको छ ।
महासंघले यसअघि नै सुनमा लगाइएको विलासिता कर र हिरालगायत बहुमूल्य पत्थरमा लगाइएको मूल्य अभिवृद्धि कर (भ्याट) का विषयमा बजेटको प्रतिक्रियामा करका यी प्रावधानले व्यावसाय तथा रोजगारीमा प्रभाव पर्ने औपचारिक धारणा सार्वजनिक गरेको थियो । महासंघका अध्यक्ष ढकालले व्यावसायीले उठाएका विषय सान्दर्भिक रहेको बताउँदै महासंघको तर्फबाट आवश्यक पहल गर्ने बताए ।