सुर्खेत , चैत २८
कालिकोटको महाबै गाउँपालिकामा आयोजित दुई दिने निशुल्क आँखा शिविर सफलतापूर्वक सम्पन्न भएको छ। यही चैत २६ र २७ गते आयोजना भएको शिविरमा जम्मा ४५३ जनाको आँखा परीक्षण गरिएको छ भने ६७ जनाको मोतिबिन्दु लगायतका शल्यक्रियाहरू गरिएको छ।

शिविरमा हिमालय आँखा अस्पताल, पोखरा र Eye Care Foundation को प्राविधिक सहकार्य रहेको थियो। साथै Oda Foundation, नेत्र ज्योति संघ तथा आँखा उपचार केन्द्र, कालिकोटको संयोजनमा कार्यक्रम सम्पन्न गरिएको हो ।

स्थानीय बासिन्दाहरूले लामो समयदेखि व्यहोर्दै आइरहेका आँखासम्बन्धी समस्यामा राहत पुगेको भन्दै गाउँपालिका अध्यक्ष खेमबहादुर सिंहले शिविर संचालनका लागि सहयोग गर्ने सम्पूर्ण संस्था र चिकित्सकहरूप्रति धन्यवाद व्यक्त गरेका छन् ।

उनले शिविर संचालनले गाउँमै सेवा पुगेको हुँदा वृद्धवृद्धा र दुर्गम बस्तीका नागरिकहरू लाभान्वित भएकोमा खुशी व्यक्त गरेका छन्।