काठमाडौँ । स्वास्थ्य व्यवसायी संघले स्वास्थ्य सामाग्री खरिदमा भइरहेको भ्रष्टाचार तथा बेथितिलाई छानबिन गर्न उच्च स्तरिय आयोग गठन गर्न माग गरेको छ ।

सोमबार स्वास्थ्य तथा जनसंख्या मन्त्री उपेन्द्र यादवलाई भेटेर संघले स्वास्थ्य सामाग्री खरिदलाई राष्ट्र र जनताको हितमा बनाउन उच्च स्तरिय आयोग गठन गर्न समेत माग गरेको हो ।

संघका अध्यक्ष नवराज बस्नेतको नेतृत्वमा गएको प्रतिनिधि मण्डलले सार्वजनिक खरिद ऐनमा उल्लेखित केही अव्यवहारिक कानुन, माफिया व्यवसायीले दिएको खरिद मापदण्ड र दरभाउपत्र बनाउने, आर्थिक कारोबारको अप्रत्यशित रकम, प्रतिस्पर्धीलाई निषेध गर्ने सर्तहरुलाई बोलपत्रमा समावेश गर्ने गरेको बताउँदै छानविनको माग गरेको छ । उक्त कार्यमा मन्त्रालय मातहतकै कर्मचारीको मिलेमतो हुँदै आएको भन्दै उनीहरुमाथि पनि कारवाहीको माग पनि संघले गरेको छ ।

त्यसैगरी मन्त्री यादवसँगको भेटमा संघका अध्यक्ष बस्नेतले आर्थिक वर्ष २०८०÷०८१ को लागि स्वास्थ्य सामाग्री खरिदको लागि सरकार र दातृ निकायको गरी करिब ३ अर्बको खरिदमा १५० करोड भ्रष्टाचार भएको भन्दै छानबिन गरी दोषीलाई कारवाही गर्न समेत माग गरेका थिए । बस्नेतले भ्रष्टाचारमा संलग्नलाई कारवाहीको दायरामा ल्याउन नियमनकारी निकायलाई सक्रिय गराउन पर्ने समेत बताए ।

संघका प्रतिनिधिसँगको भेटमा मन्त्री यादवले सुझावले आफूलाई मार्ग निर्देशन गर्ने अपेक्षा गरेको बताउँदै स्वास्थ्य क्षेत्र पहिलेको भन्दा बिग्रिदै गएको बताए । स्वास्थ्य क्षेत्र सुधारको लागि आफूले सबैका सुझावका आधार अगाडि बढ्ने प्रतिवद्धता समेत जाहेर गरे ।