अनलाइन डबली
काठमाडौँ । गैरआवासीय नेपाली सङ्घ (एनआरएनए) बद्री केसी समूहको ११ अन्तर्राष्ट्रिय महाधिवेशन आजबाट सुरु हुँदैछ । कात्तिक ३ गतेसम्म काठमाडौँमा आयोजना गरिएको महाधिवेशनको उद्घाटन राष्ट्रपति रामचन्द्र पौडैलले गर्दैछन् ।
१० औं महाधिवेशनमा नीति र नेतृत्व चयनबारे भएको विवादका कारण एनआरएनए विभाजन भएको थियो । प्रधानमन्त्री प्रचण्डको उपस्थितिमा भएको सहमति केसी समूहले कार्यान्वयन नगरेपछि एकता हुन सकेन ।
अघिल्लो महाधिवेशनमा कुल आचार्यलगायत विश्वभरबाट महाधिवेशनका सहभागी भएका प्रतिनिधिको भावना विपरित जान खोजेपछि विवाद सुरु भएको थियो । एनआरएनए चयनका विषयमा कुरा नमिलेपछि आचार्यलगायतले छुटै टीम तयार गरेपछि विनोद कुँवरको नेतृत्वमा अर्को अन्तर्राष्ट्रिय समिति बन्यो ।
आचार्य समूहमा फेरि पनि अध्यक्षमै विवाद भएपछि तीन जना अध्यक्ष बनाइयो । आलोपालो प्रणाली अनुसार पहिलो कार्यकाल कुल आचार्य, दोस्रो कार्यका रविना थापा र अहिले बद्री केसी अध्यक्ष रहेका छन् ।
सोमबार पत्रकार सम्मेलनको आयोजना गरी महाधिवेशनको तयारी पूरा भएको जानकारी दिइएको थियो । पत्रकार सम्मेलनमा प्रवक्ता सोम सापकोटाका अनुसार असोज ३० र कात्तिक १ गते विश्व ज्ञान सम्मेलन, युवा सम्मेलन र महिला सम्मेलन, वैदेशिक रोजगार तथा सामाजिक सुरक्षा कोष एवं नागरिकता ऐन तथा मताधिकार सम्बन्धमा विशेष सत्रको आयोजना गरिनेछ ।
कत्तिक २ गते एनआरएनएको नयाँ नेतृत्व चयनका लागि निर्वाचन हुने सापकोटाले जानकारी दिए । ‘फेसियल भेरिफिकेशन’ मार्फत अनलाइन भोटिङ हुनेछ ।
अध्यक्षमा फेरि पनि चार नेताको दाबी गरेका छन् । वर्तमान अध्यक्ष बद्री केसी र रविना थापाले पुनः दोहोरिन चाहेका छन् । त्यस्तै, उपाध्यक्षद्वय महेश श्रेष्ठ र आरके शर्माले पनि अध्यक्षमा उम्मेदवारी दर्ता गराएका छन् । ६ जना उपाध्यक्षको लागि १८ जनाको उम्मेदवारी परेको छ ।
