अनलाइन डबली
काठमाडौं । कोशी प्रदेशका नवनियुक्त मुख्यमन्त्री केदार कार्कीले आज शपथ लिँदैछन् । आज दिउँसो १ बजे शथपको कार्यक्रम राखिएको प्रदेश प्रमुख कार्यालयले जनाएको छ ।
कार्कीलाई सत्ता गठबन्धनले मुख्यमन्त्रीको रुपमा समर्थन गरिसकेको छ । नेपाली काँग्रेसका प्रदेशसभा संसदीय दलका नेता उद्धव थापाले शनिबार नै राजिनामा दिइसकेका छन् । कार्कीलाई दलको नेता बनाउने काँग्रेसले निर्णय गरेको छ ।
प्रधानमन्त्री तथा नेकपा माओवादी केन्द्रका अध्यक्ष प्रचण्डले शनिबार चितवनमा पत्रकारसँग कार्कीलाई गठबन्धनले विश्वसको मत दिने बताएका थिए ।
बजार हल्ला जस्तो अहिले सर्वपक्षिय सरकार बन्ने वातावरण नबनेकाले गठबन्धनकै सरकार बन्ने बताए ।
नेकपा एमालेले गठबन्धन र काँग्रेसको निर्णय विरुद्ध उभिएका कार्कीलाई समर्थन गरेर मुख्यमन्त्री बनाए पनि सरकारमा भने सहभागी हुने अबसर नपाउने देखिएको छ ।
कोशीको राजनीतिक घटनाले काँग्रेसमा संस्थापन र इतर पक्षबीच बलियो एकता भएको छ । जुन एमालेले चाहेभन्दा भिन्न हो । एमालेले कोइराला समूहलाई उचालेर गठबन्धन भत्काउने योजना बनाएको थियो ।
बालुवाटर बैठकमा भएको सहमति कोइराला समूहले कार्यान्वयन गर्यो भने कोशीमा एमालेको हात लागि शून्य नै हुने विश्लेषण सुरु भएको छ ।
मुख्यमन्त्री नियुक्त भएपछि संचारकर्मीसँगको संक्षिप्त प्रतिक्रियामा कार्कीले पनि एमालेलाई सरकारमा सहभागी गराउने विषय अहिले नभएर पछि हुने भनेर पन्छिएका थिए । उनले मध्यावधि रोक्न सफल भएको भन्दै गठबन्धन र पार्टीकै निर्णय मान्ने घुमाउरो भाषामा जवाफ दिएका थिए ।
