अनलाइन डबलीकाठमाडौं । सूचना सञ्चार तथा प्रविधि मन्त्री रेखा शर्माले सञ्चार क्षेत्रमा महिलाको सहभागीलाई बढाउन आवश्यक रहेको बताएकी छिन् ।
सोमबार काठमाडौंमा आयोजित नयाँ प्रविधिको माध्यमबाट उन्नत पत्रकारिता तालिम समापन कार्यक्रमलाई सम्बोधन गर्दै उनले ५१ प्रतिशतको जनसङ्ख्या भएका महिलाहरुको विभिन्न निकायमा ३३ प्रतिशत उपस्थिति न्यायोचित नहुने बताइन् ।
शर्माले भनिन्, ‘अहिलेको समस्या भनेको महिलाको उपस्थिति अझै पनि बढाउन जरुरी छ । ३३ प्रतिशत सहभागिता भनेको छौं । ५१ प्रतिशतको जनसङ्ख्या छ । ३३ प्रतिशतको सहभागिताले मात्र समाजको सहभागीको जवरजस्त उपस्थिति बन्न सक्दैन ।’
शर्माले उपस्थितिलाई मात्र नभएर उपस्थितिहरुको क्षमता प्रतिस्पर्धा गर्न लायकको छ कि छैन् भन्ने कुरामासमेत ध्यान दिनु पर्ने बताइन् ।
मन्त्री शर्माले महिला भएकै कारण विशेष सुविधा पाउनै पर्छ भन्ने नभई प्रतिस्पर्धाको क्षमता नै हुनु पर्नेमा उनको जोड दिइन् ।
